പട്ടാമ്പി: മേലെ പട്ടാമ്പിയില്‍ വ്യാപകമായി പൈപ്പ് പൊട്ടി ശുദ്ധജലം പാഴാകാന്നു. അധികൃതര്‍ ശരിയാക്കാനുള്ള നടപടി എടുത്തില്ലെന്ന് ആക്ഷേപം. ടൗണിലെ മേലെ പട്ടാമ്പി ജങ്്ഷനിലും പെരിന്തല്‍മണ്ണ റോഡിലുമാണ് പൈപ്പ്് പൊട്ടി ജലം റോഡിലൂടെ നീര്‍ചാലായി ഒഴുകുന്നത്. ടൗണിലെ വിവിധ കടകളിലേക്കും വീടുകളിലേക്കും വിതരണം നടത്തുന്ന പൈപ്പുലൈനുകളാണിവ.
പെരിന്തല്‍മണ്ണ റോഡില്‍ പള്ളിക്കു മുന്നിലെ പൈപ്പ് പൊട്ടിയിട്ട് മാസങ്ങളായി. അതെ സമയം ട്രാഫിക് സിഗ്‌നലിനു സമീപം വീടുകളിലേക്കും വ്യാപാര സ്ഥാപനങ്ങളിലേക്കും ടൗണിനോടു ചേര്‍ന്ന ഊടുവഴിയിലൂടെ പോകുന്ന പൈപ്പ് പൊട്ടിയും ജലം പാഴാകുന്നുണ്ട്. സ്വകാര്യ വ്യക്തിയുടെ സ്ഥാപനത്തോടു ചേര്‍ന്നുള്ള ഊടുവഴിയിലാണ് വന്‍ തോതില്‍ ശുദ്ധജലം ചോരുന്നത്. വര്‍ഷങ്ങളായി തുടരുന്ന ജല ചോര്‍ച്ചക്കെതിരേ സ്ഥാപന ഉടമയും നാട്ടുകാരും പരാതിപ്പെട്ടെങ്കിലും നടപടിയില്ല.
മേലെ പട്ടാമ്പിയില്‍ കൈത്തളിയിലും കല്‍പ്പക തെരുവിലും പൈപ്പ് പൊട്ടി ശുദ്ധജലം ചോരുന്നുണ്ട്. പട്ടാമ്പി ഭാരതപ്പുഴയിലെ പദ്ധതിയില്‍നിന്ന് വിതരണം ചെയ്യുന്ന കുടിവെള്ളം വ്യാപകമായി ചോരുന്നതിനാല്‍ വ്യാപാര സ്ഥാപനങ്ങളും ഗാര്‍ഹിക കണക്ഷഷനുകളെടുത്തവരും ജലക്ഷാമം നേരിടുകയാണ്. ജല അതോറിറ്റിയില്‍നിന്ന് ബില്ലുകള്‍ മുറ തെറ്റാതെ വരുന്നുണ്ടെങ്കിലും കുടിവെള്ളം മാത്രം കിട്ടുന്നില്ലെന്നാണ് പരാതി. അതുകൊണ്ട് തന്നെ പാഴായി പോകുന്ന ശുദ്ധജലപൈപ്പ് പൊട്ടിപോകുന്നത് നന്നാക്കണമെന്ന ആവശ്യം ശക്തമായിട്ടുണ്ട്.