ബാലുശ്ശേരി: മനുഷ്യന്റേതിന് സമാനമായ തലയുമായി പിറന്ന ആട്ടിന്‍കുട്ടി കൗതുകമാകുന്നു. കാട്ടാംവള്ളി കേളോത്ത്കണ്ടി സുരേഷിന്റെ വീട്ടിലാണ് മനുഷ്യരുടെ രൂപസാദൃശ്യമുള്ള തലയുമായി ആട്ടിന്‍കുട്ടി പിറന്നത്. ജീവനോടെയിരിക്കുന്ന ആട്ടിന്‍കുട്ടി കുപ്പിപ്പാല്‍ കുടിക്കുന്നുണ്ടെങ്കിലും തലയുയര്‍ത്താന്‍ കഴിയാത്ത അവസ്ഥയിലാണ്.
ബാലുശ്ശേരി മൃഗാശുപത്രി മുഖേന നല്‍കിയ മൂന്ന് ആടുകളിലൊന്നാണ് ശനിയാഴ്ച രാത്രി പ്രസവിച്ചത്. രണ്ട് കുട്ടികളില്‍ ഒന്നിന്റെ തലയാണ് മനുഷ്യന്റെ തലയോട് സാദൃശ്യമുള്ളത്.
ജനിത വൈകല്യമാണെന്നാണ് വെറ്ററിനറി ഡോക്ടര്‍മാരുടെ അഭിപ്രായം. കൂടുതല്‍ പരിശോധനയ്ക്കായി ആട്ടിന്‍കുട്ടിയെ വയനാട് മൃഗാശുപത്രിയിലേക്ക് കൊണ്ടുപോയി.