റിയാദ്: അറബ് മേഖലയില്‍ ഉരുണ്ടു കൂടിയ പുതിയ പ്രശ്‌നപരിഹാരത്തിനായി സഖ്യരാജ്യമായ കുവൈത്ത് കഠിനശ്രമം തുടങ്ങി. തീവ്രവാദ ഭീകരവാദ പ്രശ്‌നങ്ങളില്‍ ഖത്തറിന്റെ നിലപാടില്‍ പ്രതിഷേധിച്ച് ഖത്തറിനെതിരെ വിവിധ അറബ് രാജ്യങ്ങള്‍ നയതന്ത്ര ബന്ധം ഉപേക്ഷിച്ച് ശക്തമായ മുന്നറിയിപ്പുമായി എത്തിയ പ്രശ്‌നം രമ്യമായി പരിഹരിക്കാനാണ് കുവൈത്ത് ശ്രമം തുടരുന്നത്. മേഖലയുടെ സുരക്ഷ തന്നെ അപായപ്പെടുന്ന തരത്തിലേക്ക് നീങ്ങുന്ന ഖത്തറുമായുള്ള സഊദിയടക്കമുള്ള അറബ് രാജ്യങ്ങളുടെ അഭിപ്രായവ്യത്യാസം പരിഹരിക്കാന്‍ കുവൈത്തിനെ കൂടാതെ തുര്‍ക്കി പ്രസിഡന്റ് റജബ് ത്വയ്യിബ് ഉര്‍ദുഗാനും പ്രശ്‌നപരിഹാരത്തിനായി രംഗത്തുണ്ട്.

ഖത്തര്‍, റഷ്യ, കുവൈത്ത്, സഊദി അറേബ്യ എന്നീ രാജ്യങ്ങളുടെ തലവന്‍മാരുമായി അദ്ദേഹം ടെലഫോണ്‍ സംഭാഷണം നടത്തി. കുവൈത്ത് അമീര്‍ ശൈഖ് സബഹ് അല്‍ അഹമദ് അല്‍ ജാബിര്‍ അല്‍ സബാഹ് സഊദി രാജാവിന്റെ ഉപദേശകനും മക്ക അമീറുമായ പ്രിന്‍സ് ഖാലിദ് ബിന്‍ ഫൈസല്‍ രാജകുമാരനുമായി വിഷയം ചര്‍ച്ച ചെയ്തു. കൂടാതെ ഖത്തര്‍ അമീറുമായും ടെലഫോണില്‍ ബന്ധപ്പെട്ട് ശ്രമം ആരംഭിച്ചതായും മാധ്യമങ്ങള്‍ റിപ്പോര്‍ട്ട് ചെയ്തു. മേഖലയിലെ പ്രശ്‌നവുമായി ബന്ധപ്പെട്ട് സഊദി രാജാവ് സല്‍മാന്‍ ഇബ്‌നു അബ്ദുല്‍ അസീസിന്റെ സുപ്രധാന കത്ത് പ്രിന്‍സ് ഖാലിദ് ബിന്‍ ഫൈസല്‍ രാജകുമാരന്‍ കുവൈത്ത് അമീറിന് കൂടിക്കാഴ്ചക്കിടെ കൈമാറിയതായി കുവൈത്ത് ദേശീയ വാര്‍ത്താ ഏജന്‍സി റിപ്പോര്‍ട്ട് ചെയ്തു. ഒരു മണിക്കൂര്‍ നീണ്ട കൂടിക്കാഴ്ചക്ക് ശേഷമാണ് ഖത്തര്‍ അമീറുമായി ടെലഫോണ്‍ സംഭാഷണം നടത്തിയത്.

അതേ സമയം, നയതന്ത്രബന്ധം അയല്‍രാജ്യങ്ങള്‍ വിച്ഛേദിച്ച സംഭവത്തില്‍ ചര്‍ച്ചക്ക് തയ്യാറാണെന്ന് ഖത്തര്‍ വ്യക്തമാക്കി. പ്രശ്‌നം പരിഹരിക്കാന്‍ കുവൈത്തിന്റെയും തുര്‍ക്കിയുടെയും നേതൃത്വത്തില്‍ മധ്യസ്ഥ ശ്രമം നടക്കുന്നതിനിടെയാണ് ഖത്തര്‍ നിലപാട് വ്യക്തമാക്കിയത്. പ്രശ്‌നപരിഹാരത്തിന് ചര്‍ച്ചക്ക് മധ്യസ്ഥം വഹിക്കാന്‍ തയ്യാറാണെന്ന് അമേരിക്കയും വ്യക്തമാക്കിയിട്ടുണ്ട്. ഖത്തറുമായുള്ള നയതന്ത്രബന്ധങ്ങള്‍ വിച്ഛേദിക്കുന്നതിന് സഊദി അറേബ്യ അടക്കമുള്ള രാജ്യങ്ങളെ പ്രേരിപ്പിച്ച സാഹചര്യം അമേരിക്ക മനസ്സിലാക്കുന്നതായി വൈറ്റ്ഹൗസ് വൃത്തങ്ങള്‍ പറഞ്ഞു. ഭീകരതക്കുള്ള പിന്തുണ നിര്‍ത്തിവെക്കുന്നതിന് ആവശ്യപ്പെടുന്ന റിയാദ് ഉച്ചകോടി പ്രഖ്യാപനം ഖത്തര്‍ പാലിക്കണമെന്നും യു.എസ് വൃത്തങ്ങള്‍ ആവശ്യപ്പെട്ടു.

സഊദി അറേബ്യ, യു.എ.ഇ, ബഹ്‌റൈന്‍, ഈജിപ്ത്, മാലിദ്വീപ്, യെമന്‍, ലിബിയ എന്നീ രാജ്യങ്ങളുമാണ് ഖത്തറുമായുള്ള നയതന്ത്രബന്ധം അവസാനിപ്പിച്ചത്. ഇതോടെ ചരിത്രത്തിലില്ലാത്തവിധമുള്ള കടുത്ത പ്രതിസന്ധിയാണ് ഖത്തര്‍ അനുഭവിക്കുന്നത്. അതിനിടെ, ഇന്ന് രാജ്യത്തെ അഭിസംബോധന ചെയ്യാനുള്ള നീക്കം ഖത്തര്‍ അമീര്‍ ശൈഖ് തമീം ബിന്‍ ഹമദ് അല്‍ഥാനി നീട്ടി വച്ചു. കുവൈത്തിന്റെ അഭ്യര്‍ഥന പ്രകാരമാണിത്.

അയല്‍രാജ്യങ്ങളുമായുള്ള നയതന്ത്ര പ്രതിസന്ധി മൂര്‍ച്ഛിപ്പിക്കുന്ന നടപടികള്‍ സ്വീകരിക്കരുതെന്നും പ്രശ്‌നങ്ങള്‍ തണുപ്പിക്കുന്നതിന് ശ്രമങ്ങളുണ്ടാകണമെന്നും ഖത്തര്‍ അമീര്‍ ശൈഖ് തമീം ബിന്‍ ഹമദ് അല്‍ഥാനിയോട് കുവൈത്ത് അമീര്‍ ശൈഖ് സ്വബാഹ് അല്‍അഹ്മദ് അല്‍ജാബിര്‍ അല്‍സ്വബാഹ് ആവശ്യപ്പെട്ടിരുന്നു.

സംഘര്‍ഷം പറഞ്ഞുതീര്‍ക്കുന്നതിനുള്ള ശ്രമങ്ങള്‍ക്ക് അവസരം നല്‍കണമെന്നും ഖത്തര്‍ അമീറുമായി നടത്തിയ ഫോണ്‍ സംഭാഷണത്തില്‍ കുവൈത്ത് അമീര്‍ ആവശ്യപ്പെട്ടു. പുതിയ പ്രതിസന്ധി ഖത്തര്‍ അമീറിന്റെ അമേരിക്കന്‍ സന്ദര്‍ശനം വൈകിപ്പിക്കും. ഖത്തര്‍ അമീര്‍ അടുത്ത മാസം വാഷിംഗ്ടണ്‍ സന്ദര്‍ശിക്കാനിരിക്കെയാണ് പുതിയ സംഭവ വികാസങ്ങള്‍ അരങ്ങേറിയത്.