പുതുക്കാട്: തൃക്കൂര്‍ പാലക്കപറമ്പ് റോഡിന്റെ മെക്കാഡം ടാറിങിനുവേണ്ടി നീക്കം ചെയ്ത മണ്ണും കല്ലും മറ്റ് അവശിഷ്ടങ്ങളുമാണ് പോത്തോട്ടപറമ്പില്‍ നിക്ഷേപിച്ചത്. തുലാമാസം ഒന്നിന് നടത്താറുള്ള പോത്തോട്ട മഹോത്സവത്തിന് തടസം സൃഷ്ടിക്കുന്ന തരത്തിലായിരുന്നു പൊതുമരാമത്ത് വകുപ്പ് മണ്ണ് കൊണ്ടു തള്ളിയിരുന്നത്. മണ്ണ് നീക്കം ചെയ്യണമെന്നാവശ്യപ്പെട്ട് നിരവധി തവണ ഭക്തജന സംഘടനകളും പോത്തോട്ട മഹോത്സവം നടത്തുന്ന സമുദായങ്ങളും പരാതി നല്‍കിയെങ്കിലും യാതൊരു നടപടിയും അധികൃതര്‍ എടുത്തില്ല. ആചാരാനുഷ്ഠാനങ്ങള്‍ നടക്കുന്ന പറമ്പില്‍ നിന്ന് മണ്ണ് നീക്കം ചെയ്യാത്ത സാഹചര്യത്തില്‍ പോത്തോട്ട മഹോത്സവം അനിശ്ചിതത്വത്തിലായ വാര്‍ത്ത മാധ്യമങ്ങളില്‍ വന്നതിനെ തുടര്‍ന്നാണ് നടപടി വേഗത്തിലായത്. വാര്‍ത്തയെ തുടര്‍ന്ന് തൃക്കൂര്‍ പഞ്ചായത്ത് അധികൃതര്‍ ക്ഷേത്രപറമ്പിലെ മണ്ണ് നീക്കം ചെയ്യാന്‍ പൊതുമരാമത്ത് വകുപ്പിന് നിര്‍ദേശം നല്‍കുകയായിരുന്നു. ഇതേ തുടര്‍ന്ന് പറമ്പില്‍ കുന്നുകൂട്ടിയിട്ടിരുന്ന മണ്ണും കല്ലും പൊതുമരാമത്ത് വകുപ്പ് ലേലം ചെയ്ത് നീക്കം ചെയ്യുകയായിരുന്നു. ദൈവത്തിന്റെ പ്രതീകമായി സങ്കല്‍പ്പിക്കുന്ന കല്ലും പരിസരവും പോത്തോട്ട ദിവസം ഭക്തര്‍ വലംവെക്കുന്ന സ്ഥലത്തേയും മണ്ണ് നീക്കം ചെയ്ത് ശുചീകരിച്ചു. മുന്‍ വര്‍ഷത്തേക്കാള്‍ ഇത്തവണ കൂടുതല്‍ പോത്തുകളെ കൊണ്ടുവന്നാണ് സമുദായക്കാര്‍ മഹോത്സവം ആഘോഷിക്കുന്നത്.