തിരൂരങ്ങാടി: കഴിഞ്ഞ വര്‍ഷം ഒരു ക്ലാസില്‍ പഠിച്ചവരെ വിവിധ ക്ലാസുകളിലേക്കു മാറ്റിയിരുത്തിയതില്‍ പ്രതിഷേധിച്ചു തിരൂരങ്ങാടി ഗവ. ഹയര്‍സെക്കന്‍ഡറി സ്‌കൂളില്‍ വിദ്യാര്‍ഥിസമരം. സ്‌കൂളിലെ പ്ലസ്ടു സയന്‍സ്, കൊമേഴ്‌സ്, ഹ്യൂമാനിറ്റിസ് ബാച്ചുകളിലെ 150ലേറെ ആണ്‍കുട്ടികളാണ് ഇന്നലെ രാവിലെ മുതല്‍ ക്ലാസ് ബഹിഷ്‌കരിച്ചു സ്‌കൂള്‍ ഗേറ്റില്‍ സമരം ചെയ്യുന്നത്.

ഒന്നാം വര്‍ഷം ഒരേക്ലാസിലിരുന്നു പഠിച്ച ആണ്‍കുട്ടികളെ രണ്ടാം വര്‍ഷത്തില്‍ വിവിധ ക്ലാസുകളിലേക്കു മാറ്റിയതാണ് സമരത്തിനു കാരണം. ആണ്‍കുട്ടികളെ മാത്രം മാറ്റിയിരുത്തിയ നടപടിയില്‍ പ്രതിഷേധിച്ച വിദ്യാര്‍ഥികള്‍, സ്‌കൂളിനു പുറത്തു മുദ്രാവാക്യം വിളിച്ചു.

'മാറ്റം രക്ഷിതാക്കള്‍ ആവശ്യപ്പെട്ടത്; പ്രശ്‌നം കൂട്ടുകെട്ട് '

തിരൂരങ്ങാടി: പി.ടി.എ യോഗത്തില്‍ രക്ഷിതാക്കളുടെ നിരന്തര ആവശ്യപ്രകാരമാണ് വിദ്യാര്‍ഥികളെ ഈ വര്‍ഷം വിവിധ ക്ലാസുകളിലേക്കു മാറ്റിയിരുത്തിയതെന്നു തിരൂരങ്ങാടി ഗവ. ഹയര്‍സെക്കന്‍ഡറി സ്‌കൂള്‍ പ്രിന്‍സിപ്പല്‍ ആര്‍.പി ദിലീപ് പറഞ്ഞു.
ഇക്കാര്യത്തില്‍ വിദ്യാര്‍ഥികളില്‍നിന്ന് അഭിപ്രായം തേടിയിരുന്നു. പഠന നിലവാരത്തെ കാര്യമായി ബാധിക്കുന്ന തരത്തിലായിരുന്നു കഴിഞ്ഞ വര്‍ഷം പ്ലസ്‌വണ്ണിലെ ചില വിദ്യാര്‍ഥികളുടെ കൂട്ടുകെട്ടുകള്‍.
ഇത്തവണയും അതു തുടര്‍ന്നാല്‍ സ്‌കൂളിലെ വിജയശതമാനത്തെ ബാധിക്കുമെന്നതിനാലാണ് കംപ്യൂട്ടര്‍ സഹായത്തോടെ മുഖംനോക്കാതെ വിദ്യാര്‍ഥികളെ വിവിധ ക്ലാസുകളിലേക്കു മാറ്റിയതെന്നും സ്‌കൂള്‍ അധികൃതര്‍ പറഞ്ഞു.