പാണ്ടിക്കാട്: മഴ പെയ്താല്‍ തൊണ്ണംകടവില്‍ തോണിയിറക്കണം. ഒലിപ്പുഴക്ക് കുറുകെ നിര്‍മിച്ച നിലവിലുള്ള ക്രോസ്‌വേക്ക് ഉയരമില്ലാത്തതാണ് പ്രതിസന്ധി സൃഷ്ടിക്കുന്നത്. ഒരുമഴ പെയ്താല്‍ പോലും പുഴ പാലത്തിന്ന് മുകളിലൂടെ ഒഴുകുന്ന അവസ്ഥയാണ്. കഴിഞ്ഞ പ്രളയകാലത്ത് എട്ടോളം തവണയാണ് ക്രോസ്‌വേക്ക് മുകളിലൂടെ വെള്ളം കവിഞ്ഞൊഴുകിയതിനെ തുടര്‍ന്ന് ഗതാഗത തടസം നേരിട്ടത്.
ഇക്കാരണത്താല്‍ പാണ്ടിക്കാട് മേലാറ്റൂര്‍ പഞ്ചായത്തുകളില്‍ ഉള്‍പ്പെട്ട വളരാട്, എടയാറ്റൂര്‍ പ്രദേശങ്ങളിലെ ആയിരത്തോളം പേര്‍ ഇരുകരകളിലും എത്തിപ്പെടാന്‍ പ്രയാസപ്പെടുന്ന അവസ്ഥയാണ്. കച്ചവടത്തിന്നും ചികിത്സക്കും എടയാറ്റൂര്‍ നിവാസികള്‍ ആശ്രയിക്കുന്ന പാണ്ടിക്കാട് അങ്ങാടിയില്‍ വരാന്‍ പാലം വെള്ളത്തില്‍ മുങ്ങുന്നതോടെ ജനങ്ങള്‍ കടുത്ത ദുരിതം പേറുകയാണ്.
ഇന്നലെപുലര്‍ച്ചെയുണ്ടായ ശക്തമായ മഴയില്‍ തന്നെ പാലത്തിനു മുകളിലൂടെ വെള്ളം ഒഴുകി ഭാഗികമായി ഗതാഗത തടസമുണ്ടായി. നിര്‍മാണത്തിലെ അശാസ്ത്രീയതയാണ് ചെറുമഴ പെയ്താല്‍ പാലം വെള്ളത്തില്‍ മുങ്ങുന്ന അവസ്ഥക്കിടയാക്കുന്നത്. ക്രോസ് വേ ഉയരം കൂട്ടാന്‍ അടിയന്തിര നടപടി വേണമെന്നാണ് പ്രദേശവാസികളുടെ ആവശ്യം.