തിരുവനന്തപുരം: മുഖ്യമന്ത്രി പിണറായി വിജയന്‍ വര്‍ഗീയത വളര്‍ത്താന്‍ ശ്രമിക്കുന്നുവെന്ന് പ്രതിപക്ഷ നേതാവ് രമേശ് ചെന്നിത്തല വാര്‍ത്താസമ്മേളനത്തില്‍ ആരോപിച്ചു. എല്ലാവരെയും ഒരുപോലെ കാണേണ്ടയാളല്ലേ മുഖ്യമന്ത്രി. സി.പി.എം സെക്രട്ടറി അല്ല മുഖ്യമന്ത്രിയാണ് അദ്ദേഹമെന്ന് ഓര്‍ക്കണമെന്നും രമേശ് ചെന്നിത്തല.
ബി.ജെ.പിയും ആര്‍.എസ്.എസും പ്രശ്‌നം ആളിക്കത്തിച്ച് വര്‍ഗീയ ധ്രൂവീകരണത്തിനാണ് ശ്രമിക്കുന്നത്. ഇടതു സര്‍ക്കാര്‍ അതിനുള്ള എല്ലാ സഹായവും ചെയ്യുകയാണ്. ബി.ജെ.പിയെ വളര്‍ത്തിയാല്‍ ജനാധിപത്യ മതേതര ശക്തികളെ തളര്‍ത്താമെന്നും അത് തെരഞ്ഞെടുപ്പില്‍ ഇടതു മുന്നണിക്ക് ഗുണമാവുമെന്നുമുള്ള കുടില രാഷ്ട്രീയ തന്ത്രമാണ് സി.പി.എം പ്രയോഗിച്ചതെന്നും അദ്ദേഹം പറഞ്ഞു.
സര്‍ക്കാരിന്റെ വിവേക ശൂന്യമായ നടപടിയാണ് ഇന്നലെ ശബരിമലയില്‍ കണ്ടതെന്നും അദ്ദേഹം പറഞ്ഞു. പൊലിസിന്റെ ഹെല്‍മറ്റും ജാക്കറ്റും ധരിപ്പിച്ച് യുവതിയെ പൊലിസ് സന്നിധാനത്തെത്തിച്ചത് മാപ്പര്‍ഹിക്കാത്ത തെറ്റാണ്. സംസ്ഥാന സര്‍ക്കാര്‍ ഭക്തജനങ്ങളോട് വാശി തീര്‍ക്കുന്നത് പോലെയാണ് പെരുമാറുന്നത്.
കേരള പൊലിസ് ആക്ട് 43 (4), (5) അനുസരിച്ച് പൊലിസ് വേഷം മറ്റാരെയും ധരിപ്പിക്കാന്‍ പാടില്ല. ഇവിടെ പൊലിസ് തന്നെ ധരിപ്പിച്ചു. ഇതിന് ഉത്തരവാദിയായ പൊലിസ് ഓഫിസര്‍ക്ക് ആറു മാസം തടവ് ശിക്ഷയോ, 2,000 രൂപ പിഴയോ രണ്ടും കൂടിയോ ലഭിക്കാം. അതിനാല്‍ ഇതിന് നേതൃത്വം നല്‍കിയ ഐ.ജി ശ്രീജിത്ത് അടക്കമുള്ള പൊലിസ് ഓഫിസര്‍മാര്‍ക്കെതിരേ കേസെടുക്കണമെന്നും അദ്ദേഹം ആവശ്യപ്പെട്ടു. വിവേകശൂന്യമായ ഒരു മന്ത്രിസഭ അധികാരത്തിലുണ്ടായാല്‍ എന്തൊക്കെ സംഭവിക്കാം എന്നതിന് തെളിവാണ് ഇതൊക്കെയെന്നും ചെന്നിത്തല പറഞ്ഞു.