സ്റ്റോക്ക് ഹോം: അന്താരാഷ്ട്ര സമുദ്രനിയമങ്ങള്‍ ലംഘിച്ചെന്നാരോപിച്ച് ഹൊര്‍മുസ് കടലിടുക്കില്‍ വച്ച് കഴിഞ്ഞമാസം ഇറാന്‍ പിടികൂടിയ ബ്രിട്ടിഷ് എണ്ണക്കപ്പല്‍ സ്റ്റെനാ ഇംപെറോയെ ഏതാനും ദിവസങ്ങള്‍ക്കുള്ളില്‍ ഇറാന്‍ മോചിപ്പിച്ചേക്കും.
സ്വീഡന്‍ വിദേശകാര്യമന്ത്രാലയത്തെ ഉദ്ധരിച്ച് സ്വീഡിഷ് ടി.വിയാണ് ഇക്കാര്യം അറിയിച്ചത്.
സ്വീഡന്‍ കമ്പനിയായ സ്റ്റെനാ ബള്‍ക്കിന്റെ സ്റ്റെനാ ഇംപെറോ എന്ന ബ്രിട്ടിഷ് കപ്പല്‍ ജൂലൈ 19നാണ് ഇറാന്റെ വിപ്ലവ ഗാര്‍ഡുകള്‍ പിടികൂടിയത്.
ഈയാഴ്ച സ്വീഡന്‍ വിദേശകാര്യമന്ത്രി മാര്‍ഗറ്റ് വാള്‍സ്‌റ്റോമിനെ സന്ദര്‍ശിച്ച ഇറാന്‍ വിദേശകാര്യമന്ത്രി മുഹമ്മദ് ജാവേദ് ദാരിഫ് സ്റ്റെനാ ബള്‍ക്ക് സി.ഇ.ഒ എറിക് ഹാനലുമായും കൂടിക്കാഴ്ച നടത്തിയിരുന്നു.
ജൂലൈ നാലിന് ഇറാന്റെ ഗ്രേസ് -1 എണ്ണക്കപ്പല്‍ ബ്രിട്ടിഷ് നാവികസേന പിടികൂടിയതിനെ തുടര്‍ന്നാണ് ഇറാന്‍ ബ്രിട്ടിഷ് കപ്പല്‍ പിടികൂടിയത്. സിറിയയിലേക്ക് എണ്ണ കൊണ്ടുപോവുന്നു എന്നാരോപിച്ചായിരുന്നു ഇത്. എന്നാല്‍ കഴിഞ്ഞദിവസം കപ്പല്‍ ജിബ്രാള്‍ട്ടര്‍ കോടതി മോചിപ്പിച്ചിരുന്നു. തുടര്‍ന്ന് കപ്പലിലെ മൂന്ന് മലയാളികളടക്കമുള്ള നാവികര്‍ നാട്ടിലേക്കു തിരിച്ചിട്ടുണ്ട്.
അതേസമയം ബ്രിട്ടിഷ് കപ്പലിന്റെ ഭാവി ഇറാനിലെ ബന്ദര്‍ അബ്ബാസ് തുറമുഖത്തിലെ കോടതി തീരുമാനിക്കുമെന്നാണ് ഇറാന്‍ പറയുന്നത്.