ഇസ്മാഈല്‍ അരിമ്പ്ര

മലപ്പുറം: പ്രതീക്ഷയുടെ പച്ചത്തുരുത്ത് കവളപ്പാറയില്‍ ഇപ്പോഴും ബാക്കിയുണ്ട്. അവിടെ കുടില്‍കെട്ടി താമസിച്ച പതിനേഴു പേരുടെ വീടും സ്ഥലവും കുടുംബവും സുരക്ഷിതമാണ്.
എങ്കിലും ഭീതി നിറഞ്ഞ ദുരന്തത്തിന്റെ നടുമുറ്റത്ത് ഇനിയെങ്ങനെ അന്തിയുറങ്ങുമെന്ന ഭയമാണ് ഇവര്‍ക്കു ബാക്കിയുള്ളത്. ഇനിയൊരു തിരിച്ചുപോക്ക് ആലോചിക്കാന്‍ ആവാത്തവിധം ഭീതിയിലാണ് ക്യാംപിലും വാടകവീടുകളിലും ബന്ധുവീടുകളിലുമായി ഇവര്‍ കഴിയുന്നത്.
നാടിനെ നടുക്കിയ ദുരന്തം നടന്ന ഓഗസ്റ്റ് എട്ടിന് കവളപ്പാറയില്‍ മല കുത്തിയൊലിച്ചു വന്നപ്പോഴാണ് ഇവരുടെ താമസസ്ഥാനം ഒരു തുരുത്തായി മാറിയത്. മുത്തപ്പന്‍മല കുത്തനെ പൊട്ടിയൊഴുകി താഴ്ഭാഗത്ത് രണ്ടു ചേരികളായി തിരിയുകയായിരുന്നു. അതിനു നടുവിലായാണ് പച്ചപുതച്ചു നിന്ന ഇവരുടെ തുരുത്ത് അവശേഷിച്ചത്.
ഇരുഭാഗത്തും പാറക്കൂട്ടവും മണ്ണും ചളിയും ഉഴുതുമറിച്ചു. ഇവിടെയാണ് ഉമ്മര്‍കോയ, സന്ദീപ്, ബിരിയുമ്മ, സുകുമാരന്‍, സുനില്‍, കൃഷ്ണന്‍, ചക്കി, അയ്യപ്പന്‍, അജയന്‍, പ്രമോദ്, ശാന്ത, പ്രകാശന്‍, കൃഷ്ണന്‍കുട്ടി, ജാനു, സന്ദീപ് എന്നിവരുടെ വീട്. തൊട്ടടുത്ത തുരുത്തിലായി വിനേഷിന്റെ വീടും. ഇവരുടെ വീടുകളും സ്ഥലവും കുടുംബാംഗങ്ങളും സുരക്ഷിതരാണ്.
മീറ്ററുകള്‍ക്കപ്പുറത്തെ ഉരുള്‍പൊട്ടിയൊലിച്ച മണ്ണിനോടു ചേര്‍ന്നു പച്ചപ്പോടെ നിലനില്‍ക്കുകയാണ് ഈ തുരുത്ത്. ചുറ്റുഭാഗം ഉരുളെടുത്തു തിരിച്ചറിയാനാവാത്ത വിധമാണെങ്കിലും ഇവിടുത്തെ വീടുകളും പരിസരവും ഇപ്പോഴും നിലവിലുണ്ട്.
സ്വന്തം വീടുകളില്‍നിന്നു മാറിത്താമസിക്കുന്നതിലുള്ള മനപ്രയാസമുണ്ടെങ്കിലും ഇതേ സ്ഥലത്തേക്കുള്ള തിരിച്ചുവരവിനു മിക്കവര്‍ക്കും താല്‍പ്പര്യമില്ല. ഇവിടേക്കുള്ള ഗതാഗതമാര്‍ഗവും ഇല്ലാതായിട്ടുണ്ട്.
ഈ സ്ഥലത്തിനു പകരം മറ്റൊരു സൗകര്യപ്രദമായ സ്ഥലത്ത് വീട് അനുവദിക്കാന്‍ സര്‍ക്കാര്‍ നടപടിയുണ്ടാവണമെന്ന പ്രതീക്ഷയിലാണിവര്‍. കവളപ്പാറയിലും പരിസരത്തും മാത്രമായി 244 വീടുകളാണ് പൂര്‍ണമായോ ഭാഗികമായോ ഉരുള്‍പൊട്ടലില്‍ തകര്‍ച്ചയുണ്ടായത്. ഇതില്‍ 75 വീടുകള്‍ താമസയോഗ്യമല്ലെന്നാണ് പ്രാഥമിക നിഗമനം.