ശ്രീനഗര്‍: ഫേസ്ബുക്ക് പോസ്റ്റിന്റെ പേരില്‍ ജമ്മുകശ്മിരില്‍ അഞ്ചുപേരെ അറസ്റ്റ്‌ചെയ്തു. പൂഞ്ച് ജില്ലയിലെ രജൗറി സ്വദേശികളായ സഹീര്‍ ചൗധരി, സാകിര്‍ ഷാ ബുഖാരി, ഇമ്രാന്‍ ഖാസി, നാസിക് ഹുസൈന്‍, സര്‍ദാര്‍ താരീഖ് ഖാന്‍ എന്നിവരാണ് അറസ്റ്റിലായത്. ഐ.ടി ആക്ട് പ്രകാരമാണ് നടപടി. ജമ്മു കശ്മിരിന് പുറത്ത് ജോലി ചെയ്യുന്ന ഇവരുടെ പാസ്‌പോര്‍ട്ട് റദ്ദാക്കാനും പൊലിസ് നീക്കം ആരംഭിച്ചു. സംസ്ഥാനത്തിന്റെ പ്രത്യേകാധികാരം എടുത്തുകളഞ്ഞതിന് പിന്നാലെ സാമൂഹികമാധ്യമങ്ങളില്‍ പ്രചരിക്കുന്ന കുറിപ്പുകള്‍ കടുത്ത രീതിയിലാണ് അധികൃതര്‍ നിരീക്ഷിച്ചുവരുന്നത്. ഇതിനിടെയാണ് ഇവരുടെ പ്രകോപനപരമായ കുറിപ്പുകള്‍ ശ്രദ്ധയില്‍പ്പെട്ടതെന്ന് പൊലിസ് സൂപ്രണ്ട് പറഞ്ഞു. സമാന കേസില്‍ സംസ്ഥാനത്തുനിന്ന് കഴിഞ്ഞയാഴ്ചയും രണ്ടു പേരെ അറസ്റ്റ് ചെയ്തിരുന്നു.