റിയാദ്: വിദേശികള്‍ ചേക്കേറി പാര്‍ക്കാന്‍ ഏറെ ആഗ്രഹിക്കുന്ന രാജ്യങ്ങളില്‍ സഊദി അറേബ്യ ഏറ്റവും മുന്നിലെന്ന് റിപ്പോര്‍ട്ട്. സ്വിറ്റ്‌സര്‍ലാന്റിലെ ജനീവ ആസ്ഥാനമായ വേള്‍ഡ് ഇക്കണോമിക് ഫോറം റിപ്പോര്‍ട്ടിലാണ് താമസം, ജോലി എന്നിവയ്ക്കായി വിദേശികള്‍ ഏറ്റവും കൂടുതല്‍ ഇഷ്ടപ്പെടുന്ന രാജ്യങ്ങളുടെ പട്ടികയില്‍ സഊദി ആദ്യ പത്തില്‍ ഉള്‍പ്പെടുന്നത്. ആഗോള തലത്തില്‍ ഏഴാം സ്ഥാനത്തുള്ള സഊദി അറബ് ലോകത്തും ഏഷ്യന്‍ രാജ്യങ്ങള്‍ക്കിടയിലും ഏറ്റവും മുന്നിലാണ്. സ്‌പെയിന്‍, ഇറ്റലി, ജപ്പാന്‍, സ്വിറ്റ്‌സര്‍ലാന്റ്, സിംഗപ്പൂര്‍ അടക്കമുള്ള നിരവധി രാജ്യങ്ങളെ പിന്തള്ളിയാണ് സഊദി ഏഴാംസ്ഥാനം കൈവരിച്ചത്.

ആഗോള തലത്തില്‍ കുടിയേറ്റക്കാര്‍ ഏറ്റവുമധികം ഇഷ്ടപ്പെടുന്ന രാജ്യം അമേരിക്കയാണ്. ജര്‍മനി, കാനഡ, ബ്രിട്ടന്‍ എന്നീ രാജ്യങ്ങളാണ് രണ്ടു മുതല്‍ നാല് വരെയുള്ള സ്ഥാനങ്ങളില്‍. അഞ്ചാം സ്ഥാനത്ത് ഫ്രാന്‍സും ആറാം സ്ഥാനത്ത് ഓസ്‌ട്രേലിയയുമാണ്. സ്‌പെയിന്‍, ഇറ്റലി,സ്വിറ്റ്‌സര്‍ലാന്‍ഡ് എന്നീ രാജ്യങ്ങളാണ് സഊദിക്ക് പിന്നില്‍ ആദ്യ പത്തില്‍ ഉള്‍പ്പെട്ട പ്രധാന രാജ്യങ്ങള്‍. കുടിയേറ്റക്കാരുടെ ഇഷ്ട രാജ്യമായി അമേരിക്ക ഏറെ കാലമായി ഒന്നാംസ്ഥാനത്താണ്.