മലപ്പുറം: ജില്ലയില്‍ 12 മൊബൈല്‍ ടവറുകള്‍ക്ക് ഇന്നലെ കലക്ടറേറ്റില്‍ ചേര്‍ന്ന ജില്ലാ ടെലികോം സമിതി അനുമതി നല്‍കി. കുറുവ, പുഴക്കാട്ടിരി, വേങ്ങര, പെരിന്തല്‍മണ്ണ, കുഴിമണ്ണ, കൂട്ടിലങ്ങാടി, മക്കരപ്പറമ്പ്, കാവന്നൂര്‍, എടവണ്ണ, ആനക്കര, ചേലേമ്പ്ര എന്നിവിടങ്ങളിലെ ടവര്‍ നിര്‍മാണത്തിനാണ് അനുമതി നല്‍കിയത്.
വാഴക്കാട്, പുഴക്കാട്ടിരി, മേലാറ്റൂര്‍ എന്നിവിടങ്ങളിലെ വിവിധ ടവറുകളുടെ നിര്‍മാണത്തിന് അനുമതി നല്‍കുന്ന കാര്യം അടുത്ത സിറ്റിങില്‍ പരിഗണിക്കും. പുഴക്കാട്ടിരിയിലെ ടവര്‍ നിര്‍മാണം ഭൂനിയമങ്ങള്‍ ലംഘിച്ചുകൊണ്ടാണെന്ന നാട്ടുകാരുടെ പരാതി വിശദമായി പരിശോധിക്കും. വളവന്നൂരിലെ റിലയന്‍സിന്റെ ടവര്‍ നിര്‍മാണം ട്രൈബ്യൂണല്‍ വിധി വന്ന ശേഷം മാത്രമേ പരിഗണിക്കാന്‍ കഴിയൂവെന്ന് കലക്ടര്‍ അറിയിച്ചു.
ടവറില്‍നിന്നുള്ള വികിരണം സംബന്ധിച്ച ആശങ്കകളാണ് സമിതിക്ക് മുന്നില്‍ ഏറെയും വന്നത്. ആഗോള മാനദണ്ഡത്തിന്റെ പത്തിലൊന്ന് മാത്രമാണ് ഇന്ത്യയില്‍ മൊബൈല്‍ ടവറുകളുടെ വികിരണമെന്ന് ടെലികോം എന്‍ഫോഴ്‌സ്‌മെന്റ് ആന്‍ഡ് റിസോഴ്‌സ് മോണിറ്ററിങ് സെല്‍ അസി. ഡയറക്ടര്‍ ജനറല്‍ എസ്. ഹരികൃഷ്ണന്‍ വിശദീകരിച്ചു. ജനങ്ങളുടെ പരാതികള്‍ പരിഹരിക്കാന്‍ സുതാര്യമായ സംവിധാനങ്ങളുണ്ട്. പരാതികളുണ്ടെങ്കില്‍ വികിരണം പരിശോധിച്ച് സേവനദാതാക്കള്‍ക്കെതിരേ നടപടിയെടുക്കാന്‍ വ്യവസ്ഥയുണ്ടെന്നും അദ്ദേഹം പറഞ്ഞു. അതേസമയം വീടിന് ഭീഷണിയാകുമെന്ന കാരണത്താല്‍ മേലാറ്റൂരില്‍ റിലയന്‍സ് സ്ഥാപിക്കുന്ന മൊബൈല്‍ ടവര്‍ മാറ്റി സ്ഥാപിക്കാന്‍ ജില്ലാകലക്ടര്‍ അമിത് മീണ നിര്‍ദേശം നല്‍കി. റിലയന്‍സ് പുതുതായി സ്ഥാപിക്കുന്ന ടവര്‍ തന്റെ വീടിന് ഭീഷണിയാണെന്ന് കാണിച്ച് മേലാറ്റൂര്‍ സ്വദേശിയായ അബ്ദുസലിമാണ് ജില്ലാ ടെലികോം സമിതിയെ സമീപിച്ചത്. ടവര്‍ നിര്‍മാണത്തിന് അതേ സര്‍വേ നമ്പരിലുള്ള സുരക്ഷിതമായ സ്ഥലം കണ്ടെത്താവുന്നതാണെന്നും കലക്ടര്‍ നിര്‍ദേശിച്ചു.
മലിനീകരണ നിയന്ത്രണ ബോര്‍ഡ് അസി. എക്‌സി. എന്‍ജിനിയര്‍ വരുണ്‍ നാരായണന്‍, ആരോഗ്യ വകുപ്പിലെ ടെക്‌നിക്കല്‍ അസിസ്റ്റന്റ് വേലായുധന്‍ തുടങ്ങിയവര്‍ യോഗത്തില്‍ സംബന്ധിച്ചു.