ബോവിക്കാനം: പൊവ്വല്‍ എല്‍.ബി.എസ് എന്‍ജിനിയറിങ് കോളജില്‍ സംഘര്‍ഷം. എം.എസ്.എഫ് നേതാക്കള്‍ക്കു നേരെ അക്രമവുമുണ്ടായി. കഴിഞ്ഞ ദിവസം രാത്രി ഒന്‍പതോടെയാണ് സംഭവം. കോളജില്‍ നടന്ന യൂനിയന്‍ തെരഞ്ഞെടുപ്പില്‍ യു.ഡി.എസ്.എഫ് സഖ്യം വിജയിച്ചിരുന്നു. ഇതിനുശേഷം യു.ഡി.എസ്.എഫ് പ്രവര്‍ത്തകരെ ആക്രമിക്കുകയും എം.എസ്.എഫ് പ്രവര്‍ത്തകരായ വിദ്യാര്‍ഥികളെ എസ്.എഫ്.ഐ പ്രവര്‍ത്തകര്‍ കോളജ് കാംപസിനകത്തുള്ള ഹോസ്റ്റലില്‍നിന്നു പുറത്താക്കുകയുമായിരുന്നു.
സംഭവമറിഞ്ഞെത്തിയ എം.എസ്.എഫ് സംസ്ഥാന ഉപാധ്യക്ഷന്‍ ഹാഷിം ബംബ്രാണിക്കും ജില്ലാ ജനറല്‍ സെക്രട്ടറി സി.ഐ ഹമീദ് അടക്കമുള്ള നേതാക്കള്‍ക്കും നേരെ എസ്.എഫ്.ഐ പ്രവര്‍ത്തകര്‍ പടക്കം നിറച്ച ബിയര്‍ കുപ്പികളും കല്ലുകളും എറിയുകയായിരുന്നു. വിദ്യാര്‍ഥികളെ ഹോസ്റ്റലില്‍ താമസിപ്പിക്കണമെന്ന് കോളജ് അധികൃതരും നേതാക്കളും ആവശ്യപ്പെട്ടെങ്കിലും സമ്മതിച്ചില്ല. ഇതേതുടര്‍ന്ന് എം.എസ്.എഫ് നേതാക്കളും പ്രവര്‍ത്തകരും ഹോസ്റ്റലിനു മുന്നില്‍ ഉപരോധ സമരം ആരംഭിക്കുകയായിരുന്നു. രാത്രി ഒരു മണിയോടെ ഡിവൈ.എസ്.പി അടക്കമുള്ള ഉന്നത പൊലിസ് ഉദ്യോഗസ്ഥര്‍ സ്ഥലത്തെത്തി ചര്‍ച്ചനടത്തുകയും വിദ്യാര്‍ഥികളെ ഹോസ്റ്റലില്‍ പ്രവേശിക്കാന്‍ അനുവദിക്കുകയും ചെയ്തതോടെയാണ് ഉപരോധം അവസാനിപ്പിച്ചത്.