റിയാദ്: യമനില്‍ അറബ് സഖ്യ സേന നടത്തിയ വ്യോമാക്രമണത്തില്‍ നിരവധി തടവുകാര്‍ കൊല്ലപ്പെട്ടെന്ന് വാര്‍ത്തയില്‍ വിശദീകരണവുമായി അറബ് സഖ്യ സേന രംഗത്ത്. തലസ്ഥാന നഗരിയായ സന്‍ആയിലെ ധാമറില്‍ കഴിഞ്ഞ ദിവസം നടന്ന വ്യോമാക്രമണത്തില്‍ നിരവധി പേര്‍ കൊല്ലപ്പെട്ടിരുന്നു. എന്നാല്‍, ഇവിടെ തടവ് കേന്ദ്രത്തിനു നേരെയാണ് ആക്രമണം നടന്നതെന്നും കൊല്ലപ്പെട്ടവരില്‍ നിരവധിയാളുകള്‍ തടവുകാരാണെന്നും ഐക്യരാഷ്ട്ര സഭയടക്കം ആരോപണവുമായി രംഗത്തെത്തിയിരുന്നു. ഇതിനിടയാണ് വിശദീകരണവുമായി അറവ് സഖ്യ സേന രംഗത്തെത്തിയത്. അറബ് സഖ്യ സേന ബോംബാക്രമണം നടത്തിയ കേന്ദ്രം ഹൂതികളുടെ നിയന്ത്രണത്തിലുള്ള പ്രദേശമായിരുന്നുവെന്നും ഹൂതികളുടെ സൈനിക കേന്ദ്രമായിരുന്നു ഇതെന്നും അറബ് സഖ്യ സേന വക്താവ് കേണല്‍ തുര്‍ക്കി അല്‍ മാലികി വ്യക്തമാക്കി.

അത് തടവ് കേന്ദ്രമായിരുന്നില്ലെന്നതിനു സഖ്യ സേനയുടെ പക്കല്‍ തെളിവുകളുണ്ടെന്നും അദ്ദേഹം വ്യക്തമാക്കി. ഹൂതികള്‍ ഉപയോഗിക്കുന്ന ആധുനിക ആയുധങ്ങള്‍ അവര്‍ക്ക് ഇറാന്‍ സഹായം ലഭിക്കുന്നത്തിന് വ്യക്തമായ തെളിവുകളാണെന്നും ഹുദൈദ തുറമുഖം വഴിയാണ് ഹൂഥികള്‍ക്ക് ആയുധങ്ങള്‍ ലഭിക്കുന്നതെന്നും അദ്ദേഹം പറഞ്ഞു. ധാമറിലെ ഹൂതി സൈനിക കേന്ദ്രം വ്യോമാക്രമണത്തില്‍ തകര്‍ത്ത വേളയില്‍ സാധാരണക്കാരെ സുരക്ഷിതമാക്കിയുള്ള ആക്രമണമാണ് നടത്തിയതെന്നും അദ്ദേഹം കൂട്ടിച്ചേര്‍ത്തു. ആക്രമണം നടത്തിയ ഞായറാഴ്ച്ചയും അറബ് സഖ്യ സേന ഇതേ വാദവുമായി രംഗത്തെത്തിയിരുന്നു