ഓമശ്ശേരി: പ്രമുഖ പണ്ഡിതനും നാലര പതിറ്റാണ്ടോളം പുതിയോത്ത് മഹല്ല് സെക്രട്ടറിയുമായിരുന്ന കെ.പി അബൂബക്കര്‍ മുസ്‌ലിയാരുടെ വിയോഗത്തോടെ നാടിന് നഷ്ടമായത് മികച്ച സംഘാടകനെ.
സാമൂഹിക ബന്ധങ്ങള്‍ക്ക് പ്രാധാന്യം കല്‍പ്പിച്ചിരുന്ന ഇദ്ദേഹം നാട്ടുകാര്‍ക്ക് കുടുംബാംഗത്തെ പോലെയായിരുന്നു. പ്രദേശത്തെ സമസ്തയുടെ പ്രവര്‍ത്തനങ്ങള്‍ക്ക് മുന്നില്‍നിന്ന അബൂബക്കര്‍ മുസ്‌ലിയാരുടെ സംഘടനാ പാടവം മാതൃകകളേറെയുള്ളതായിരുന്നു.
മുണ്ടുപാറ, നടമ്മല്‍പൊയില്‍, പുത്തൂര്‍ എന്നിവിടങ്ങളില്‍ ഖത്വീബായും 40 വര്‍ഷത്തോളം കെടയത്തൂര്‍ ശിആദുല്‍ ഇസ്‌ലാം മദ്‌റസാ പ്രധാനാധ്യാപകനായും പി.സി കുഞ്ഞാലന്‍കുട്ടി മുസ്‌ലിയാര്‍ സ്മാരക ഹിഫ്‌ളുല്‍ ഖുര്‍ആന്‍ കോളജിന്റെ കണ്‍വീനറായും പ്രവര്‍ത്തിച്ചിട്ടുണ്ട്. കാന്തപുരം, കത്തറമ്മല്‍, ഉരുളിക്കുന്ന്, പുതിയോത്ത് ദര്‍സ്, കെടയത്തൂര്‍ എം.എം.എല്‍.പി സ്‌കൂള്‍ എന്നിവിടങ്ങളിലായിരുന്നു പ്രാഥമിക പഠനം. കൈപ്പറ്റ മുഹമ്മദ് മുസ്‌ലിയാരുടെ പ്രധാന ശിഷ്യന്മാരില്‍ ഒരാളാണ്. രാവിലെ നടന്ന മയ്യിത്ത് നമസ്‌കാരത്തിന് വാവാട് കുഞ്ഞിക്കോയ മുസ്‌ലിയാര്‍, മരുമകന്‍ പി.സി യൂസുഫ് ഫൈസി എന്നിവര്‍ നേതൃത്വം നല്‍കി.
ഇന്നലെ പുതിയോത്ത് പള്ളിയില്‍ നടന്ന അനുസ്മരണ യോഗം പി.സി ഉബൈദ് ഫൈസി ഉദ്ഘാടനം ചെയ്തു. കുയ്യില്‍ ഹുസൈന്‍ ഹാജി അധ്യക്ഷനായി. യു.പി.സി അബൂബക്കര്‍ കുട്ടി ഫൈസി, കെ. മുഹമ്മദ് ബാഖവി, സയ്യിദ് അലി അക്ബര്‍ തങ്ങള്‍ സംസാരിച്ചു. കനിങ്ങുംപുറത്ത് അബ്ദുല്ല മുസ്‌ലിയാരുടെയും റുഖിയ ഹജ്ജുമ്മയുടെയും മകനായി 1946 ലാണ് ഇദ്ദേഹം ജനിച്ചത്.