തിരുവനന്തപുരം: സംസ്ഥാനത്തെ നാല് ജില്ലകളില്‍ ഇന്ന് ശക്തമായ മഴയ്ക്ക് സാധ്യതയെന്ന് കാലാവസ്ഥാ നിരീക്ഷണ കേന്ദ്രം. ഇടുക്കി, കോഴിക്കോട്, കണ്ണൂര്‍, കാസര്‍കോട് ജില്ലകളിലാണ് മഴയ്ക്ക് സാധ്യത. ഇവിടെ യെല്ലോ അലര്‍ട്ട് പ്രഖ്യാപിച്ചിട്ടുണ്ട്. നാളെ കോഴിക്കോട്, കണ്ണൂര്‍, കാസര്‍കോട് ജില്ലകളിലും ഏഴിന് കണ്ണൂര്‍, കാസര്‍കോട് ജില്ലകളിലും എട്ടിന് കോഴിക്കോടും കണ്ണൂരും യെല്ലോ അലര്‍ട്ട് പ്രഖ്യാപിച്ചിട്ടുണ്ട്.
ഇന്നലെ സംസ്ഥാനത്ത് പരക്കെ മഴ പെയ്തു. വടകരയിലാണ് ഏറ്റവും കൂടുതല്‍ മഴ ലഭിച്ചത്. ഇവിടെ എട്ടു സെന്റീമീറ്ററും മണ്ണാര്‍ക്കാട് ഏഴ് സെ.മീറ്ററും മഴ ലഭിച്ചു. തൃശൂരിലെ വെള്ളാനിക്കരയില്‍ ആറു സെന്റിമീറ്ററും ഒറ്റപ്പാലം, മാനന്തവാടി, തളിപ്പറമ്പ്, തലശേരി എന്നിവിടങ്ങളില്‍ അഞ്ച് സെ.മീ വീതവും കരിപ്പൂര്‍ എയര്‍പോര്‍ട്ട്, പൊന്നാനി, ചാലക്കുടി, വടക്കാഞ്ചേരി, ആലത്തൂര്‍, പറമ്പിക്കുളം, പട്ടാമ്പി, കൊയിലാണ്ടി, അമ്പലവയല്‍ എന്നിവിടങ്ങളില്‍ നാലു സെ.മീ വീതവും മഴ ലഭിച്ചു.
ശക്തമായ കാറ്റിന് സാധ്യതയുള്ളതിനാല്‍ ഇന്ന് കര്‍ണാടക, മഹാരാഷ്ട്ര, ഗോവ തീരങ്ങളിലും മധ്യബംഗാള്‍ ഉള്‍ക്കടല്‍, അതിനോടു ചേര്‍ന്നുള്ള തെക്ക് ബംഗാള്‍ ഉള്‍ക്കടല്‍ ഭാഗങ്ങളിലും എട്ടുവരെ തെക്കുപടിഞ്ഞാറ്, മധ്യ പടിഞ്ഞാറ് അറബിക്കടല്‍ ഭാഗങ്ങളിലും മത്സ്യബന്ധനത്തിന് പോകരുതെന്ന് കാലാവസ്ഥാനിരീക്ഷണ കേന്ദ്രം മുന്നറിയിപ്പ് നല്‍കി. കേരള തീരത്ത് മത്സ്യബന്ധനത്തിന് തടസങ്ങളില്ല.