കൊല്ലം: ഓടിക്കൊണ്ടിരുന്ന കെഎസ്ആര്‍ടിസി ബസിനുള്ളില്‍ കണ്ടക്ടര്‍ക്ക് നേരെ യാത്രക്കാരന്റെ ക്രൂരമായ ആക്രമണം. കൊല്ലം ഡിപ്പോയിലെ കണ്ടക്ടറും മുഖത്തല സ്വദേശിയുമായ വിനുവിനാണ് പരിക്കേറ്റത്. സംഭവത്തില്‍ ഇരവിപുരം സ്വദേശി അരുണിനെ കുണ്ടറ പൊലിസ് കസ്റ്റഡിയിലെടുത്തു. കൊല്ലം മധുര ഫാസ്റ്റ് പാസഞ്ചര്‍ ബസില്‍ ഇന്നലെ രാത്രിയാണ് നാടകീയമായ സംഭവങ്ങള്‍ അരങ്ങേറിയത്. ബസ് കേരളപുരത്ത് എത്തിയപ്പോള്‍ ചവിട്ടുപടിയില്‍ നിന്ന പ്രതിയോട് ഉള്ളിലേക്ക് കയറി നില്‍ക്കാന്‍ കണ്ടക്ടര്‍ ആവശ്യപ്പെട്ടു.

ഇതില്‍ പ്രകോപിതനായ അരുണ്‍, വിനുവിനെ മര്‍ദിക്കുകയും നെറ്റിയില്‍ കടിച്ച് പരിക്കേല്‍പ്പിക്കുകയുമായിരുന്നു. പരിക്കേറ്റ കണ്ടക്ടറെ ഉടന്‍ തന്നെ സമീപത്തെ ആശുപത്രിയില്‍ പ്രവേശിപ്പിച്ചു. ഇതേതുടര്‍ന്ന് സര്‍വീസ് തടസ്സപ്പെടുകയും പിന്നീട് മറ്റൊരു കണ്ടക്ടറെ എത്തിച്ച് യാത്ര തുടരുകയും ചെയ്തു. സഹയാത്രികരുടെ മൊഴിയുടെ അടിസ്ഥാനത്തില്‍ കുണ്ടറ പൊലിസ് സ്ഥലത്തെത്തി പ്രതിയെ പിടികൂടി. ഔദ്യോഗിക കൃത്യനിര്‍വഹണം തടസ്സപ്പെടുത്തിയതിനും മര്‍ദനത്തിനും പ്രതിക്കെതിരെ ജാമ്യമില്ലാ വകുപ്പുകള്‍ പ്രകാരം കേസെടുത്തിട്ടുണ്ട്.

ALSO READ: എസ്.ഐ.ആർ: അന്തിമ വോട്ടർ പട്ടിക ഇന്ന് പ്രസിദ്ധീകരിക്കും; 8.97 ലക്ഷം പേർ പുറത്ത്

A KSRTC conductor was hospitalized with a forehead injury after being bitten and assaulted by a passenger who grew violent when asked to move from the bus footboard.