ഗൂഡല്ലൂര്‍: മദ്യശാലക്കെതിരേയുള്ള സമരക്കാരെ നേരിടാന്‍ പൊലിസെത്തിയെങ്കിലും സമരക്കാരെത്തിയില്ല. കൂമൂലയിലെ മദ്യശാലക്കെതിരേ സമരം ശക്തമാക്കുമെന്ന വാര്‍ത്ത പരന്നതോടെയാണ് പൊലിസ് പ്രദേശത്ത് സുരക്ഷ ശക്തമാക്കിയത്.
 എന്നാല്‍ ഏറെ സമയം കഴിഞ്ഞിട്ടും സമരക്കാരെത്താതായതോടെ പൊലിസ് തിരിച്ചു പോകുകയായിരുന്നു. സുപ്രികോടതി വിധിയെ തുടര്‍ന്ന് പന്തല്ലൂരിലെ ടാസ്മാക് മദ്യശാല കൂമൂലയിലേക്ക് മാറ്റിയിരുന്നു. ഇതിനെതിരേ പ്രദേശവാസികളുടെ നേതൃത്വത്തില്‍ പ്രതിഷേധ സമരങ്ങളും നടത്തിയിരുന്നു. എന്നാല്‍ മദ്യശാല മാറ്റാന്‍ അധികൃതര്‍ നടപടിയെടുത്തിരുന്നില്ല.
കഴിഞ്ഞദിവസം പ്രദേശവാസികള്‍ മദ്യശാലക്കെതിരേ സമരത്തിനെത്തുമെന്ന വാര്‍ത്ത പരന്നതോടെ ദേവാലയില്‍ നിന്ന് വനിതാ പൊലിസ് ഉള്‍പെടെ സമരം നേരിടാന്‍ മദ്യശാലക്ക് സമീപമെത്തിയിരുന്നു. എന്നാല്‍ ഏറെ വൈകിയിട്ടും സമരക്കാരെത്തിയില്ല