ആലക്കോട് (കണ്ണൂര്‍): കാന്‍സര്‍ ബാധിച്ച് മരിച്ച സ്ത്രീയുടെ മൃതദേഹം രണ്ടു ദിവസമായിട്ടും ആശുപത്രി അധികൃതര്‍ വിട്ടുനല്‍കിയില്ലെന്ന് പരാതി. കണ്ണൂര്‍ ആലക്കോട് തേര്‍ത്തല്ലി സ്വദേശിനി ചെട്ടിയവീട്ടില്‍ സി.പി രത്‌നകുമാരി (54) യുടെ മൃതദേഹമാണ് പണം നല്‍കാത്തതിന്റെ പേരില്‍ തൃശൂര്‍ രൂപതയുടെ കീഴിലുള്ള ജൂബിലി മിഷന്‍ ആശുപത്രി അധികൃതര്‍ തടഞ്ഞുവച്ചത്.

ബുധനാഴ്ച ഉച്ചക്ക് 2.30ഓടെയാണ് ചികിത്സയിലിരിക്കെ ഇവര്‍ മരിച്ചത്. 2006 ജൂലൈ നാലുമുതല്‍ ജൂബിലി മിഷന്‍ ആശുപത്രിയില്‍ കാന്‍സര്‍ രോഗത്തിന് ചികിത്സ നടത്തിവരികയായിരുന്നു. അവസാനമായി 47 ദിവസം മുന്‍പാണ് ഈ ആശുപത്രിയില്‍ പ്രവേശിപ്പിച്ചത്. ആശുപത്രിയില്‍ ചികിത്സ നടത്തിയ വകയില്‍ 3,30,000 രൂപ അടച്ചാല്‍ മാത്രമെ മൃതദേഹം വിട്ടുനല്‍കാനാകൂ എന്ന പിടിവാശിയിലാണ് ആശുപത്രി അധികൃതര്‍. കുറച്ചു പണം തരാമെന്ന് പറഞ്ഞിട്ടും ആശുപത്രി അധികൃതര്‍ ചെവിക്കൊണ്ടില്ല.

മരണം സംഭവിച്ച് അഞ്ചു മണിക്കൂര്‍ കഴിഞ്ഞിട്ടും മൃതദേഹം മോര്‍ച്ചറിയിലേക്ക് മാറ്റിയിരുന്നില്ല. തുടര്‍ന്ന് കണ്ണൂരില്‍ നിന്നും സഹോദരന്‍ എത്തി ഫ്രീസറിന്റെ വാടക നല്‍കിയതിനുശേഷമാണ് മൃതദേഹം മോര്‍ച്ചറിയിലേക്ക് മാറ്റിയത്. തൃശൂര്‍ മുതുവറ സ്വദേശി അച്ചുതനാണ് ഭര്‍ത്താവ്. കഴിഞ്ഞ പതിനഞ്ചു വര്‍ഷമായി തമിഴ്‌നാട് ഈറോഡില്‍ ഒരു സ്വകാര്യ പാരലല്‍ കോളജില്‍ അധ്യാപികയായി ജോലി ചെയ്തുവരികയാണ് രത്‌നകുമാരി. ആലക്കോട് മേഖലയില്‍നിന്ന് സംസ്‌കൃതത്തില്‍ പി.എച്ച്.ഡി നേടിയ ആദ്യ വനിത കൂടിയാണ് രത്‌നകുമാരി.