ബാഗ്ലൂര്‍: സര്‍ക്കാര്‍ നിലപാടുകളോട് വിയോജിച്ച് കൊണ്ടുള്ള ഐ.എ.എസ് ഉദ്യോഗസ്ഥരുടെ രാജി തുടരുന്നു. ഐ.എ.എസ് ഉദ്യോഗസ്ഥനായ എസ് ശശികാന്ത് സെന്തില്‍ കര്‍ണാടകയിലെ ഡെപ്യൂട്ടി കമ്മിഷനര്‍ സ്ഥാനം രാജിവെച്ചു. ഇന്ന് ഉച്ചയോടെ രാജിക്കാര്യം അറിയിക്കുകയായിരുന്നു.

'ഇനിയും തുടരാന്‍ വ്യക്തിപരമായിട്ട് പ്രയാസമുണ്ട്്, നമ്മുടെ രാജ്യത്തിന്റെ ഭരണഘടനയും ജനാധിപത്യവും വൈവിധ്യങ്ങളില്‍ നിന്ന്‌കൊണ്ട് കളങ്കപ്പെടുന്നു, അതിന്റെ കൂടെ നില്‍ക്കാനാവില്ല' തീരുമാനം തീര്‍ത്തും വ്യക്തിപരമാണെന്നും ആരുടേയും നിര്‍ബന്ധപ്രകാരമല്ലെന്നും സെന്തില്‍ കുറിച്ചു. സിവില്‍ സര്‍വിസിനുപുറത്ത് നിന്ന് ഒരുപക്ഷേ രാജ്യത്തെ സേവിക്കാനാകുമെന്ന പ്രതീക്ഷ തനിക്കുണ്ട്. ഒപ്പം തന്റെ കൂടെ പ്രവര്‍ത്തിച്ചവരോടും കര്‍ണാടകയിലെ ആളുകളോടും നന്ദി പറഞ്ഞുകൊണ്ടാണ് ശശികാന്തിന്റെ കത്ത് അവസാനിപ്പിക്കുന്നത്.

ഓഗസ്റ്റ് 21ന് ജമ്മുകശ്മിരില്‍ അഭിപ്രായ സ്വാതന്ത്ര്യം നിഷേധിച്ചതില്‍ പ്രതിഷേധിച്ച് കേരളത്തില്‍ നിന്നുള്ള കണ്ണന്‍ ഗോപിനാഥ് രാജിവെച്ചതിനുശേഷമാണ് സെന്തിലിന്റെ രാജി.