കല്‍പ്പറ്റ: സംസ്ഥാന വാഫി കലോത്സവത്തിന്റെ രണ്ടാംഘട്ട എ സോണ്‍ കലോത്സവത്തില്‍ കണ്ണൂര്‍ മാമ്പ അശുഹദാ ഓവറോള്‍ ചാംപ്യന്‍മാരായി. 591 പോയിന്റോടെയാണു കിരീടം. 548 പോയിന്റോടെ ആതിഥേയരായ ശംസുല്‍ ഉലമ അക്കാദമി വെങ്ങപ്പള്ളി രണ്ടാംസ്ഥാനവും 508 പോയിന്റോടെ മജ്മഅ് കാവനൂര്‍ മൂന്നാംസ്ഥാനവും നേടി. ഊല വിഭാഗത്തില്‍ 230 പോയിന്റുകളോടെ സഹ്‌റാ പാനൂരും ആലിയ വിഭാഗത്തില്‍ 308 പോയിന്റുകളോടെ മാമ്പ അശുഹദയും ജേതാക്കളായി.
അശുഹദയിലെ സല്‍മാനുല്‍ ഫാരിസ് ആലിയ വിഭാഗത്തിലും സഹ്‌റയിലെ എസ്.കെ മുഹമ്മദ് ഊല വിഭാഗത്തിലും സര്‍ഗപ്രതിഭകളായി. മജ്മഅ് കാവനൂരിലെ മുഹമ്മദ് ഫായിസ് ആലിയ വിഭാഗത്തില്‍ കലാപ്രതിഭയായി. ബി സോണ്‍ കലോത്സവം ഇന്നും നാളെയുമായി പാനൂര്‍ സഹ്‌റാ കാംപസില്‍ നടക്കും. ജനുവരിയില്‍ കണ്ണൂരിലാണു വാഫി ഗ്രാന്‍ഡ് കലോത്സവം.
സമാപനം വാഫി കാംപസ് ഡയരക്ടര്‍ ഇബ്രാഹിം ഫൈസി റിപ്പണ്‍ ഉദ്ഘാടനം ചെയ്തു. വാഫി അസി, കോര്‍ഡിനേറ്റര്‍ ഡോ. ലുഖ്മാന്‍ വാഫി അല്‍അസ്ഹരി ട്രോഫി സമ്മാനിച്ചു. ഫെസ്റ്റ് കണ്‍ട്രോളര്‍ അലി ഹുസൈന്‍ വാഫി ഫലപ്രഖ്യാപനം നടത്തി.
സമസ്ത വയനാട് ജില്ലാ പ്രസിഡന്റ് കെ.ടി ഹംസ മുസ്‌ലിയാര്‍, ഇബ്രാഹിം ഫൈസി പേരാല്‍, ഹാഫിസ് ജഅ്ഫര്‍ വാഫി, ശിഹാബുദീന്‍ തങ്ങള്‍ വാഫി, താജുദീന്‍ ഞെക്ലി, അനീസ് നെല്ലിക്കുത്ത്, യാസര്‍ അറഫാത്ത് പങ്കെടുത്തു.