കൊല്ലം: ജില്ലയിലെ മുഴുവന്‍ പൊലിസ് ഉദ്യോഗസ്ഥരേയും ഉള്‍പ്പെടുത്തി നടത്തിയ മിന്നല്‍ പരിശോധനയില്‍ കൊല്ലം സിറ്റിയില്‍ വിവിധ കേസുകളിലായി രണ്ടായിരത്തോളം പേര്‍ കുടുങ്ങി.
കൊല്ലം സിറ്റി പൊലിസ് മേധാവിയുടെ നിര്‍ദേശ പ്രകാരം ജില്ലയിലെ വിവിധ പൊലിസ് സ്റ്റേഷനുകളിലായി അടിപിടി, മോഷണം ഉള്‍പ്പെടെയുള്ള കേസുകളില്‍ പിടികിട്ടാപുള്ളികളായ ഒമ്പതുപേരെയും 56 വാറണ്ട് പ്രതികളേയും അറസ്റ്റ് ചെയ്തു.
കൂടാതെ പ്രത്യേക പരിശോധനയുടെ ഭാഗമായി നിരോധിത പുകയില ഉല്‍പന്നങ്ങള്‍ വിറ്റതിന് ആറുപേര്‍ക്കെതിരേയും മയക്കുമരുന്നുകള്‍ ഉപയോഗിച്ചതിന് എട്ടുപേര്‍ക്കെതിരേയും കേസുകള്‍ രജിസ്റ്റര്‍ ചെയ്തു.
മദ്യപിച്ച് വാഹനം ഓടിച്ചതിന് 72 പേര്‍ക്കെതിരേയും അലക്ഷ്യമായും അപകടകരമായും വാഹനം ഓടിച്ചതിന് 100 പേര്‍ക്കെതിരേയും പൊതുനിരത്തില്‍ മദ്യപിച്ച് കലഹം ഉണ്ടാക്കിയതിനും പൊതുസ്ഥലത്ത് മദ്യപിച്ചതിനും 69 പേര്‍ക്കെതിരേയും കേസെടുത്തു. വാഹനപരിശോധന നടത്തിയതില്‍ 760 പേര്‍ക്കും, പൊതുസ്ഥലത്ത് പുകവലിച്ചതിന് 54 പേര്‍ക്കെതിരേയും പിഴ ചുമത്തി.
കൊല്ലം സിറ്റി പൊലിസ് കമ്മിഷണറുടെ നിര്‍ദേശപ്രകാരം ചാത്തന്നൂര്‍ എ.സി.പി ജവഹര്‍ജനാര്‍ദ്, കരുനാഗപ്പള്ളി എ.സി.പി ശിവപ്രസാദ് എന്നിവരുടെ നേതൃത്വത്തിലായിരുന്നു പരിശോധന. വരുംദിവസങ്ങളില്‍ ഇത്തരം മിന്നല്‍ പരിശോധനകള്‍ ജില്ലയില്‍ വിവിധ പൊലിസ് സ്റ്റേഷനുകളിലായി തുടരുമെന്നും ജില്ലാ പൊലിസ് മേധാവി അജിതാ ബീഗം അറിയിച്ചു.