തിരുവനന്തപുരം: ഭിക്ഷാടന നിരോധനത്തിനും പുനരധിവാസത്തിനും നിലവിലുള്ള നിയമത്തിലെ പാളിച്ചകള്‍ പരിഹരിച്ച് ഫലപ്രദമായി നടപ്പിലാക്കണമെന്ന് സംസ്ഥാന മനുഷ്യാവകാശ കമ്മിഷന്‍. മത-സാമുദായിക-സാംസ്‌കാരിക സംഘടനകളുടെ സഹകരണം ഭിക്ഷാടന നിവാരണ, പുനരധിവാസ മേഖലയില്‍ പ്രോത്സാഹിപ്പിക്കണമെന്ന് കമ്മിഷന്‍ അംഗം കെ. മോഹന്‍കുമാര്‍ ചീഫ് സെക്രട്ടറിക്കും തദ്ദേശസ്വയംഭരണ, സാമൂഹ്യനീതി വകുപ്പ് സെക്രട്ടറിമാര്‍ക്കും നിര്‍ദേശം നല്‍കി. തെരുവില്‍ അലയുന്നവരെ സംരക്ഷിക്കുക, ഭിക്ഷാടനമാഫിയയുടെ ചൂഷണത്തില്‍ നിന്ന് മോചിപ്പിക്കുക തുടങ്ങിയവ തദ്ദേശ സ്ഥാപനങ്ങളും സര്‍ക്കാരും പ്രായോഗികമായി നടപ്പിലാക്കണമെന്നും ഉത്തരവില്‍ പറയുന്നു. ഭിക്ഷാടകര്‍ക്ക് ഭക്ഷണവും പാര്‍പ്പിടവും വസ്ത്രവും ഉറപ്പുവരുത്തണമെന്നാവശ്യപ്പെട്ട് പൊതുപ്രവര്‍ത്തകനായ ജി.പ്രസാദ് വാകയാര്‍ സമര്‍പ്പിച്ച പരാതിയിലാണ് ഉത്തരവ്.