താമരശ്ശേരി: മുസ്‌ലിംലീഗ് നേതാവും താമരശേരിയിലെ പൗര പ്രമുഖനുമായ കെ.സി.മാമു മാസ്റ്റര്‍(68) അന്തരിച്ചു. കൊടുവള്ളി ബ്ലോക്ക് പഞ്ചായത്ത് മുന്‍ പ്രസിഡണ്ടും താമരശ്ശേരി ഗ്രാമപഞ്ചായത്ത് മുന്‍ വൈസ് പ്രസിഡണ്ടുമാണ്. പരപ്പന്‍ പൊയില്‍ നുസ്‌റത്ത് സ്‌കൂള്‍ സ്ഥാപകനും താമരശ്ശേരി സി.എച്ച് സെന്ററിന്റെ പ്രഥമ പ്രസിഡണ്ടുമാണ്. താമരശ്ശേരി അര്‍ബന്‍ കോഓപറേറ്റീവ് സൊസൈറ്റി പ്രസിഡണ്ടുമായിരുന്നു.

1968ല്‍ പരപ്പന്‍ പൊയില്‍ മുസ്ലിം യൂത്ത് ലീഗ് സെക്രട്ടറിയായി പ്രവര്‍ത്തനം ആരംഭിച്ചു. പഞ്ചായത്ത് യൂത്ത് ലീഗ് സെക്രട്ടറി, പ്രസിഡന്റ്, താലൂക്ക് യൂത്ത് ലീഗ് സെക്രട്ടറി, ജില്ലാ യൂത്ത് ലീഗ് സെക്രട്ടറി ശേഷം വാര്‍ഡ് ലീഗ് പ്രസിഡന്റ്, പഞ്ചായത്ത് ലീഗ് പ്രസിഡന്റ് എന്നീ സ്ഥാനങ്ങള്‍ വഹിച്ചു. എട്ടു വര്‍ഷം മണ്ഡലം ലീഗ് വൈസ് പ്രസിഡന്റ് സ്ഥാനവും വഹിച്ചു. നിലവില്‍ ജില്ലാ ലീഗ് കമ്മറ്റി അംഗമാണ് .

കൊടുവള്ളി മണ്ഡലം യു.ഡി.എഫ് കണ്‍വീനറായി തുടരവെയാണ് രോഗബാധിതനാവുന്നത്. 33 വര്‍ഷം അധ്യാപകനായി ഈങ്ങാപ്പുഴ എം.ജി.എം ഹൈസ്‌കൂളില്‍ സേവനം ചെയ്തു.

ഒരു തവണ ജില്ലാ പഞ്ചായത്ത് മെമ്പറായും രണ്ട തവണ ബ്ലോക്ക് പഞ്ചായത്ത് മെമ്പറായും താമരശ്ശേരി ഗ്രാമപഞ്ചായത്ത് വൈസ് പ്രസിഡന്റായും പ്രവര്‍ത്തിച്ചു. താമരശ്ശേരി സഹകരണ ബാങ്കിലും മില്‍ക്ക് സൊ സൈറ്റിയിലും ഡയരക്ടറായും അര്‍ബന്‍ ബാങ്ക് സൊസൈറ്റിയുടെ പ്രസിഡന്റായും പ്രവര്‍ത്തിച്ചിട്ടുണ്ട്.
10 വര്‍ഷം താമരശ്ശേരി സി.എച്ച് സെന്റര്‍ പ്രസിഡന്റായും പ്രവര്‍ത്തിച്ചു. 1968ല്‍ രൂപീകരിച്ച പരപ്പന്‍ പൊയില്‍ നുസ്‌റത്തുല്‍ മുഹ്താജീന്‍ സംഘത്തിന്റെ 43 വര്‍ഷം ജനറല്‍ സിക്രട്ടറിയും സ്‌കൂള്‍ മാനേജരുമായി പ്രവര്‍ത്തിച്ചു.

പരപ്പന്‍ പൊയില്‍ വായനശാലയുടെ സെക്രട്ടറിയായും രിയാളുല്‍ ഉലൂം മദ്രസയുടെ സെക്രട്ടറിയും പ്രസിഡന്റുമായി ദീര്‍ഘകാലം പ്രവര്‍ത്തിച്ചു. പരപ്പന്‍ പൊയില്‍ മസ്ജിദുല്‍ നൂര്‍ പ്രസിഡന്റ്, രാരോത്ത് ഗവ:മാപ്പിള ഹൈസ്‌കൂളിന്റെ 14 വര്‍ഷത്തെ പി.ടി.എ പ്രസിഡന്റായും സേവനം ചെയ്തു.

മയ്യത്ത് നിസ്‌ക്കാരം രാവിലെ ഒമ്പത് മണിക്ക് വാവാട് ജുമാമസ്ജിദില്‍ .