ഗസ്സ: ഫലസ്തീനിലെ ഗസ്സ മുനമ്പില്‍ ഇസ്‌റാഈലിന്റെ റോക്കറ്റ് ആക്രമണ പരമ്പര. ഫലസ്തീനിലെ തീരദേശ മേഖലയിലാണ് കഴിഞ്ഞ ദിവസം പുലര്‍ച്ചെ 87 തവണ ഇസ്‌റാഈല്‍ സൈന്യം റോക്കറ്റ് വിക്ഷേപിച്ചത്. ഇസ്‌റാഈലി വാര്‍ത്താ ഏജന്‍സിയായ വൈനെറ്റാണ് വാര്‍ത്ത പുറത്തുവിട്ടത്.
ഇസ്‌റാഈല്‍ ആക്രമണത്തില്‍ ഗസ്സ നഗരത്തിന്റെ മധ്യത്തിലുള്ള നാലുനില കെട്ടിടം പാടേ തകര്‍ന്നിട്ടുണ്ട്. ഇതിനു പുറമേ, കാരുണ്യ സ്ഥാപനങ്ങള്‍ക്കും ഗവേഷണ കേന്ദ്രങ്ങള്‍ക്കും കേടുപാടുകള്‍ സംഭവിച്ചു. വടക്കന്‍ ഗസ്സ മുനമ്പിലുള്ള ഇന്തോനേഷ്യന്‍ ആശുപത്രിയെ ലക്ഷ്യമിട്ടും ആക്രമണമുണ്ടായതായി ഗസ്സയിലെ ആരോഗ്യ മന്ത്രാലയം അറിയിച്ചു.
ദക്ഷിണ ഇസ്‌റാഈലിലേക്കു ഫലസ്തീന്റെ ഭാഗത്തുനിന്നുണ്ടായ റോക്കറ്റ് ആക്രമണത്തിനു തിരിച്ചടിയായാണ് ഇന്നലത്തെ ആക്രമണമെന്ന് ഇസ്‌റാഈല്‍ പ്രതികരിച്ചു. 34 തവണ ദക്ഷിണ ഇസ്‌റാഈലില്‍ ഫലസ്തീനില്‍നിന്നുള്ള റോക്കറ്റുകള്‍ പതിച്ചതായാണ് ഇസ്‌റാഈല്‍ ആരോപണം. ആക്രമണത്തിന്റെ ഉത്തരവാദിത്തം സായുധ വിഭാഗമായ ഫലസ്തീനിയന്‍ ഇസ്‌ലാമിക് ജിഹാദ് ഏറ്റെടുത്തിട്ടുണ്ട്.
വെള്ളിയാഴ്ച ഇസ്‌റാഈല്‍ സൈന്യം നടത്തിയ ആക്രമണത്തില്‍ അഞ്ചു ഫലസ്തീനികള്‍ കൊല്ലപ്പെട്ടിരുന്നു. ഇതിനു തിരിച്ചടിയായായിരുന്നു തങ്ങളുടെ ആക്രമണമെന്നു സംഘടന വാര്‍ത്താകുറിപ്പില്‍ അറിയിച്ചു. അവര്‍ കൊല്ലുക, തങ്ങള്‍ നിശബ്ദരായിരിക്കുക എന്ന സമവാക്യം അനുസരിക്കാന്‍ തയാറല്ലെന്നും സംഘടന വാര്‍ത്താകുറിപ്പില്‍ വ്യക്തമാക്കി. അതേസമയം, ആക്രമണം തല്‍ക്കാലത്തേക്കു നിര്‍ത്തിവച്ചതായി ഇസ്‌ലാമിക് ജിഹാദ് നേതാക്കള്‍ അറിയിച്ചതായി മിഡില്‍ ഈസ്റ്റ് ഐ റിപ്പോര്‍ട്ട് ചെയ്തു. ഈജിപ്തിന്റെ മധ്യസ്ഥതയില്‍ നടന്ന അനുരഞ്ജന ചര്‍ച്ചയെ തുടര്‍ന്നാണ് തീരുമാനമെന്നു നേതാക്കള്‍ വ്യക്തമാക്കി.