ചങ്ങരംകുളം: കോക്കൂര്‍ എ.എച്ച്.എം ഗവ. ഹയര്‍ സെക്കന്‍ഡറി സ്‌കൂളിന്റെ പുതിയ ഹയര്‍ സെക്കന്‍ഡറി ബ്ലോക്കിന്റെ ഉദ്ഘാടനം ഇന്ന് 11ന് സ്പീക്കര്‍ പി ശ്രീരാമകൃഷ്ണനും ചുറ്റുമതില്‍ ഉദ്ഘാടനം ജില്ലാ പഞ്ചായത്ത് പ്രസിഡന്റ് എ.പി ഉണ്ണികൃഷ്ണന്‍ നിര്‍വഹിക്കും.
ജില്ലാ പഞ്ചായത്ത് അംഗം എം.ബി ഫൈസല്‍ അധ്യക്ഷനാകും. ബ്ലോക്ക് പ്രസിഡന്റ് ആറ്റുണ്ണി തങ്ങള്‍, ഗ്രാമപഞ്ചായത്ത് പ്രസിഡന്റ് അയിഷ ഹസ്സന്‍ കൂടാതെ ജനപ്രതിനിധികളും രാഷ്ട്രീയ സാംസ്‌കാരിക നായകന്മാരും പങ്കെടുക്കും. പൊന്നാനി എം.എല്‍.എ. പി ശ്രീരാമകൃഷ്ണന്റെ ആസ്തി വികസന ഫണ്ടുപയോഗിച്ച് 70 ലക്ഷം രൂപ ചെലവില്‍ നിര്‍മിച്ചതാണ് പുതിയ ഹയര്‍ സെക്കന്‍ഡറി ബ്ലോക്ക്. സ്‌കൂളിനു വേണ്ടി ജില്ലാ പഞ്ചായത്ത് 25 ലക്ഷം രൂപക്ക് പണിതതാണു ചുറ്റുമതില്‍.
ഇതിനു പുറമെ ഹയര്‍സെക്കന്‍ഡറിയുടെ ബാക്കി കെട്ടിടം കൂടി പണിയാന്‍ സ്പീക്കര്‍ പി ശ്രീരാമകൃഷ്ണന്റെ ശ്രമഫലമായി സര്‍ക്കാര്‍ 2.62 കോടി രൂപ കൂടി അനുവദിച്ചിട്ടുണ്ട്. അതിന്റെ പണികള്‍ ഉടന്‍ തുടങ്ങും. കഴിഞ്ഞ രണ്ടു വര്‍ഷമായി സ്‌കൂളിന്റെ നിലവാരം മെച്ചപ്പെടുത്താന്‍ പി.ടി.എ നടത്തിയ ഇടപെടല്‍ ഫലം കണ്ടു. ഈ വര്‍ഷവും കഴിഞ്ഞ വര്‍ഷവും എസ്.എസ്.എല്‍ സിക്ക് ഉപജില്ലയില്‍ ഒന്നാം സ്ഥാനം ലഭിച്ചു. പൂര്‍വവിദ്യാര്‍ഥികള്‍ അസംബ്ലിഹാളും സമ്പൂര്‍ണ കുടിവെള്ളപദ്ധതിയും കമാനവും സ്റ്റെയര്‍ കേസും ശുചിമുറികളും നിര്‍മിച്ചുനല്‍കി. സ്‌കൂള്‍ 50 വര്‍ഷം പിന്നിടുന്ന സാഹചര്യത്തില്‍ ഒരു വര്‍ഷം നീണ്ടു നില്‍ക്കുന്ന ആഘോഷ പരിപാടിക്കൊരുങ്ങുകയാണു പി.ടി.എയും നാട്ടുകാരും.