കൊല്ലം: രാവിലെ എഴുന്നേറ്റാല്‍ കുട്ടികള്‍ ആവേശത്തോടെ സ്‌കൂളിലേക്ക് പോകും വിധത്തില്‍ സ്‌കൂളുകളുടെ അന്തരീക്ഷം മാറ്റുന്നതിനാണ് സംസ്ഥാന സര്‍ക്കാര്‍ ലക്ഷ്യമിടുന്നതെന്ന് എം മുകേഷ് എം.എല്‍.എ.
തൊഴില്‍വകുപ്പ്, ജില്ലാ ലീഗല്‍ സര്‍വിസ് അതോറിറ്റി, ചൈല്‍ഡ് ലൈന്‍ എന്നിവയുടെ സംയുക്തഭിമുഖ്യത്തില്‍ അഞ്ചാലുംമൂട് ഗവണ്‍മെന്റ് ഹയര്‍ സെക്കന്‍ഡറി സ്‌കൂളില്‍ സംഘടിപ്പിച്ച ബാലവേല വിരുദ്ധ ദിനാചരണം ഉദ്ഘാടനം ചെയ്യുകയായിരുന്നു അദ്ദേഹം. പൊതു വിദ്യാലയങ്ങളുടെ ഭൗതികാന്തരീക്ഷവും പഠനിലവാരവും മെച്ചപ്പെടുത്തി വിദ്യാഭ്യാസ മേഖലയെ സുശക്തമാക്കുന്നതിനുള്ള പദ്ധതികളാണ് സര്‍ക്കാര്‍ ആവിഷ്‌കരിച്ചിട്ടുള്ളതെന്ന് അദ്ദേഹം ചൂണ്ടിക്കാട്ടി.
സംസ്ഥാന ബാലാവകാശ കമ്മീഷനംഗം സി.ജെ ആന്റണി അധ്യക്ഷതനായി. ജില്ലാ ലീഗല്‍ സര്‍വിസ് അതോറിറ്റി സെക്രട്ടറി ആര്‍ സുധാകാന്ത് ബാലവേല വിരുദ്ധ ദിന സന്ദേശം നല്‍കി.
കോര്‍പ്പറേഷന്‍ കൗണ്‍സിലര്‍ എം ഗോപകുമാര്‍, ജില്ലാ ലേബര്‍ ഓഫിസര്‍ കെ.എസ് സിന്ധു, സ്‌കൂള്‍ ഹെഡ്മിസ്ട്രസ് ശോഭനാദേവി, സ്‌കൂള്‍ മാനേജ്‌മെന്റ് കമ്മിറ്റി വൈസ് ചെയര്‍മാന്‍ ലിബുമോന്‍ പങ്കെടുത്തു. ജില്ലാ ലേബര്‍ ഓഫിസര്‍(എന്‍ഫോഴ്‌സ്‌മെന്റ്) എ ബിന്ദു സ്വാഗതവും ചൈല്‍ഡ് ലൈന്‍ ജില്ലാ കോഓര്‍ഡിനേറ്റര്‍ സി എബ്രഹാം നന്ദിയും പറഞ്ഞു.