അപേക്ഷ നല്‍കിയത് 79,945 പേര്‍

.

മലപ്പുറം: പ്ലസ്‌വണ്‍ പ്രവേശനത്തിന്റെ ട്രയല്‍ അലോട്ട്‌മെന്റ് ലിസ്റ്റില്‍ ജില്ലയില്‍നിന്ന് ഇടംപിടിച്ചത് 31,929 പേര്‍. ജില്ലയില്‍ ആകെയുള്ള 40,032 മെറിറ്റു സീറ്റുകളില്‍ ഇനിയുള്ളത് 8,103 സീറ്റുകള്‍ മാത്രം. 2017-18 വര്‍ഷ ഹയര്‍സെക്കന്‍ഡറി പ്രവേശനത്തിന് 79,945 വിദ്യാര്‍ഥികളാണ് അപേക്ഷ നല്‍കിയിരുന്നത്. ഇതില്‍ 48,016 പേരാണ് ലിസ്റ്റില്‍ ഇടംപിടിക്കാതെപോയത്.
ജനറല്‍ വിഭാഗത്തില്‍ 21,420 സീറ്റുകളുള്ള ജില്ലയില്‍ മുഴുവന്‍ സീറ്റുകളിലും അലോട്ട്‌മെന്റ് നടന്നു. സംവരണ വിഭാഗങ്ങളായ മുസ്‌ലിം, ഈഴവ, തിയ്യ, ബില്ലവ, വിശ്വകര്‍മ വിഭാഗങ്ങളിലെ മുഴുവന്‍ സീറ്റുകളും ട്രയല്‍ അലോട്ട്‌മെന്റില്‍ ഉള്‍പ്പെടുത്തിയിട്ടുണ്ട്. മുസ്‌ലിം സംവരണം 1,754, ഈഴവ, തിയ്യ, ബില്ലവ 2,161, വിശ്വകര്‍മ 449 എന്നിങ്ങനെയാണ് സീറ്റുനില.
മറ്റു വിഭാഗങ്ങളിലെ സീറ്റ് വിവരങ്ങള്‍, അലോട്ട്‌മെന്റ് ലഭിച്ചവര്‍, ബാക്കിയുള്ള സീറ്റുകള്‍ ബ്രാക്കറ്റില്‍. എല്‍.സി: ആംഗ്ലോ ഇന്ത്യന്‍: 856, 41 (815), കൃസ്ത്യന്‍ ഒ.ബി.സി: 322, 62 (260), ഹിന്ദു ഒ.ബി.സി: 856, 711 (145), എസ്.സി: 5,784 , 4,476 (1,308), എസ്.ടി: 4,080, 191 (3,889), ഭിന്നശേഷി: 1,082, 539 (543), അന്ധര്‍: 175 ,35 (140), ദേവര: 449 , 4 (445), കുശവന്‍: 322, 83 (239), കുടുമ്പി: 322, 3 (319).
ട്രയല്‍ അലോട്ട്‌മെന്റ് വിവരങ്ങള്‍ പരിശോധിച്ച് ആവശ്യമായ തിരുത്തല്‍ വരുത്തുന്നതിനുള്ള സമയം ഇന്നു വൈകിട്ട് നാലുവരെയാണ്. ട്രയല്‍ അലോട്ട്‌മെന്റ് വിവരങ്ങള്‍ മുഴുവന്‍ അപേക്ഷകരും പരിശോധിക്കണമെന്നു ഹയര്‍സെക്കന്‍ഡറി ഡയറക്ടറേറ്റ് നിര്‍ദേശിച്ചിട്ടുണ്ട്. 19നു പ്രസിദ്ധീകരിക്കുന്ന ആദ്യ അലോട്ട്‌മെന്റിന്റെ ചെറിയൊരു സാധ്യത ലിസ്റ്റാണ് ഇന്നലെ പ്രസിദ്ധീകരിച്ച ട്രയല്‍ അലോട്ട്‌മെന്റ്. ട്രയല്‍ അലോട്ട്‌മെന്റ് വിവരങ്ങളുടെ അടിസ്ഥാനത്തില്‍ വിദ്യാര്‍ഥികള്‍ അപേക്ഷകള്‍ തിരുത്തിയാല്‍ അലോട്ട്‌മെന്റ് നില മാറും.