തളിപ്പറമ്പ്: സ്വകാര്യ ബസിന് സൈഡ് കൊടുത്തില്ലെന്നാരോപിച്ച് പ്രായമായ സ്ത്രീകള്‍ ഉള്‍പ്പെടെയുള്ള കാര്‍ യാത്രികരെ തടഞ്ഞുനിര്‍ത്തി മര്‍ദിക്കുകയും കാര്‍ തകര്‍ക്കുകയും ചെയ്ത സംഭവത്തില്‍ ഏഴു പേര്‍ക്കെതിരേ കേസെടുത്തു. നാലു പേരെ അറസ്റ്റ് ചെയ്തു. മറ്റുള്ളവര്‍ക്കായി തെരച്ചില്‍ ഊര്‍ജിതമാക്കി. മാഹി മഞ്ചക്കല്‍ സ്വദേശി ഇ.കെ സോജിത്തും സുഹൃത്തും സോജിത്തിന്റെ അമ്മയുമാണ് ഞായറാഴ്ച ചുടലയില്‍ കാറില്‍ അക്രമത്തിനിരയായത്. സോജിത്തിന്റെ ഒന്നര പവനോളം തൂക്കം വരുന്ന സ്വര്‍ണമാലയും 35,000 രൂപയും നഷ്ടപ്പെട്ടിരുന്നു.
കെ.കെ ഫഹദ്, ജിതിന്‍ കെ രാജ്, എ.വി സതീഷ്, സുബൈര്‍ എന്നിവരാണ് അറസ്റ്റിലായത്. പ്രതികള്‍ സഞ്ചരിച്ച ഇന്നോവ കാര്‍ പോലിസ് കസ്റ്റഡിയില്‍ എടുത്തിട്ടുണ്ട്.