കൊച്ചി: മലയാളി താരം ഏഴ് വയസുകാരന്‍ അലക്‌സ് ജോര്‍ജ്ജിന് യു.എ.ഇ ദേശീയ ചെസ്സ് കിരീടം. എട്ട് വയസ്സിന് താഴെയുള്ളവരുടെ വിഭാഗത്തിലാണ് ഏഴില്‍ ഏഴ് പോയിന്റും നേടി അലക്‌സ് ചാംപ്യനായത്. വിവിധ എമിറേറ്റ്‌സുകളില്‍ നിന്നുള്ള ചാംപ്യന്‍മാരാണ് ദേശീയ ചാംപ്യന്‍ഷിപ്പില്‍ മത്സരിച്ചത്.
എറണാകുളം കിഴക്കമ്പലം സ്വദേശിയും റഷ്യന്‍ വ്യവസായിയുമായ ജോര്‍ജ് ജേക്കബിന്റെയും റഷ്യന്‍ സ്വദേശിനി ലാലിത യെലെന്‍ നൂറിന്റെയും പുത്രനാണ് അലക്‌സ് ജോര്‍ജ്. ദുബൈയില്‍ റെപ്റ്റ സ്‌കൂളില്‍ രണ്ടാം ക്ലാസ് വിദ്യാര്‍ഥിയാണ്. നിലവില്‍ അണ്ടര്‍ എട്ട് ദുബൈ ചാംപ്യനാണ് അലക്‌സ്.
റഷ്യന്‍ ഗ്രാന്‍ഡ് മാസ്റ്റര്‍ സെര്‍ഗെ കയ്‌മോവാണ് അലക്‌സിന്റെ പരിശീലകന്‍. യു.എ.ഇ നാഷണല്‍ ചെസ്സ് ഫെഡറേഷനാണ് ചാംപ്യന്‍ഷിപ്പ് സംഘടിപ്പിച്ചത്. കഴിഞ്ഞ വര്‍ഷം കോഴിക്കോട് നടന്ന കേരള അണ്ടര്‍ എട്ട് ചെസ്സ് ചാംപ്യന്‍ഷിപ്പില്‍ അലക്‌സ് രണ്ടാമതെത്തിയിരുന്നു.