അത്തോളി: വാട്‌സ് ആപ്പ് കൂട്ടായ്മയുടെ കൈത്താങ്ങില്‍ പെണ്‍കുട്ടിക്ക് തുടര്‍വിദ്യാഭ്യാസത്തിനുള്ള സഹായം.
അത്തോളി വാട്‌സ് ആപ്പ് കൂട്ടായ്മയുടെ നേതൃത്വത്തിലാണ് അരിയോന്നുകണ്ടി സുരേഷിന്റെ മകള്‍ സൂര്യക്ക് മെഡിക്കല്‍ വിദ്യാഭ്യാസത്തിനുള്ള പ്രാഥമിക ചെലവിലേക്ക് സാമ്പത്തിക സഹായം നല്‍കിയത്. അത്തോളി ഗവ. ഹയര്‍സെക്കന്‍ഡറി സ്‌കൂളില്‍നിന്നു പ്ലസ് ടു ജയിച്ച സൂര്യക്ക് ബംഗളൂരുവിലാണ് ബി.എസ്.സി നഴ്‌സിങ്ങിന് പ്രവേശനം ലഭിച്ചത്. എന്നാല്‍ സാമ്പത്തിക പ്രയാസം കാരണം കോളജില്‍ പ്രവേശനം നേടാന്‍ പറ്റാത്ത അവസ്ഥയിലായതിനെ തുടര്‍ന്നാണ് അത്തോളി വാട്‌സ് ആപ്പ് കൂട്ടായ്മ ഇക്കാര്യത്തില്‍ ഇടപെട്ടത്. സഹായം അഭ്യര്‍ഥിച്ച് വാട്‌സ് ആപ്പില്‍ മെസേജ് ഇട്ടതോടെ അത്തോളി സ്റ്റേഷനിലെ പൊലിസ് ഉദ്യോഗസ്ഥരടക്കം സഹായം സ്വരൂപിക്കുന്നതില്‍ പങ്കാളികളായി.
സമാഹരിച്ച തുക മുതിര്‍ന്ന മാധ്യമപ്രവര്‍ത്തകന്‍ ജാഫര്‍ അത്തോളി സൂര്യയുടെ വീട്ടില്‍ വച്ച് കൈമാറി. സുനില്‍ കൊളക്കാട്, രാധാകൃഷ്ണന്‍ ഒള്ളൂര്‍, ഷൗക്കത്ത് അത്തോളി, അജീഷ് അത്തോളി, ഷെമിന്‍ വേളൂര്‍, റജി സി.ടി, ബിജേഷ്, ബഷീര്‍ കൂലനാളി സംബന്ധിച്ചു. നാലു പെണ്‍കുട്ടികളടങ്ങിയ കുടുംബം താമസിച്ചിരുന്ന സുരേഷിന്റെ വീട് നേരത്തെ കത്തി നശിച്ചതിനെ തുടര്‍ന്ന് അത്തോളി പ്രസ് ഫോറം നേതൃത്വത്തില്‍ പ്രവാസികളുടെയും നാട്ടുകാരുടെയും സഹായത്തോടെ നിര്‍മിച്ച് നല്‍കിയിരുന്നു.