കുന്ദമംഗലം: മര്‍കസ് വിദ്യാഭ്യാസ തട്ടിപ്പിനിരയായ വിദ്യാര്‍ഥികള്‍ നടത്തുന്ന സമരം ഒത്തുതീര്‍പ്പാക്കുന്നതിന് പി.ടി.എ റഹീം എം.എല്‍.എ വിളിച്ചുചേര്‍ത്ത യോഗവും തീരുമാനമാകാതെ പിരിഞ്ഞു.
എം.എല്‍.എയ്ക്ക് പുറമെ എം.കെ രാഘവന്‍ എം.പി, കുന്ദമംഗലം ഗ്രാമപഞ്ചായത്ത് പ്രസിഡന്റ് ടി.കെ സീനത്ത്, മര്‍കസ് പ്രതിനിധികള്‍, സമരസമിതി അംഗങ്ങള്‍, വിദ്യാര്‍ഥി പ്രതിനിധികള്‍ തുടങ്ങിയവര്‍ പങ്കെടുത്ത യോഗത്തില്‍ അംഗീകാരം നേടിയെടുക്കാന്‍ ഒരു മാസത്തെ കാലാവധി വേണമെന്ന് മര്‍കസ് പ്രതിനിധികള്‍ ആവശ്യപ്പെട്ടു. എം.പിയും എം.എല്‍.എയും വിദ്യാഭ്യാസ മന്ത്രിയുമായി ബന്ധപ്പെട്ട് കോഴ്‌സിന് അംഗീകാരം നേടുന്നതിനാവശ്യമായത് ചെയ്യാനും ധാരണയായി.
അതേസമയം യോഗത്തില്‍ കൃത്യമായ തീരുമാനമെടുക്കാനാകാത്തതിനാല്‍ സമരവുമായി ബന്ധപ്പെട്ടുള്ള കാര്യങ്ങള്‍ ചര്‍ച്ച ചെയ്യുന്നതിന് ഇന്ന് വിദ്യാര്‍ഥികള്‍ യോഗം ചേരും.