ദേവര്‍ഷോല: ജില്ലാഭരണകൂടത്തിന്റെ നേതൃത്വത്തില്‍ ദേവര്‍ഷോല ഗവ. ഹയര്‍ സെക്കന്‍ഡറി സ്‌കൂളില്‍ നടന്ന പരിപാടിയില്‍ ദേവര്‍ഷോല പഞ്ചായത്തില്‍ 659 ആദിവാസി കുടുംബങ്ങള്‍ക്ക് തമിഴ്‌നാട് സര്‍ക്കാരിന്റെ സൗജന്യ വീടുകളുടെ വര്‍ക്ക് ഓര്‍ഡര്‍ വിതരണം ചെയ്തു. 21 എസ്.ഇ കുടുംബങ്ങള്‍ക്കും വീടുകളുടെ വര്‍ക്ക് ഓര്‍ഡറുകള്‍ വിതരണം നടത്തി.
2.10 ലക്ഷം രൂപ ഫണ്ട് ഉപയോഗിച്ചാണ് വീടുകള്‍ നിര്‍മിക്കുന്നത്. ജില്ലാ കലക്ടര്‍ ജെ. ഇന്നസെന്റ് ദിവ്യ വിതരണോദ്ഘാടനം നിര്‍വഹിച്ചു. നീലഗിരി ജില്ലയില്‍ ഇത് കൂടാതെ 340 സൗജന്യ ഭവനങ്ങളുടെ നിര്‍മാണ പ്രവൃത്തികള്‍ നടക്കുന്നുണ്ടെന്ന് പരിപാടിയുടെ ഉദ്ഘാടനം നിര്‍വഹിച്ച് ജില്ലാ കലക്ടര്‍ പറഞ്ഞു.
സെക്ഷന്‍ 17-വിഭാഗം ഭൂമിയില്‍പ്പെട്ട സ്ഥലങ്ങളിലാണ് ആദിവാസികളുടെ വീടുകളുടെ നിര്‍മാണ പ്രവൃത്തികള്‍ നടക്കുന്നത്. സെക്ഷന്‍ 17-വിഭാഗം ഭൂമി പ്രശ്‌നവുമായി ബന്ധപ്പെട്ട കേസ് സുപ്രിംകോടതിയില്‍ നടന്ന് വരികയാണ്. പ്രസ്തുത വിഷയത്തില്‍ കേസ് നടന്ന് വരുന്നത് കാരണം തമിഴ്‌നാട് സര്‍ക്കാര്‍ ആദിവാസി ഗ്രാമങ്ങളില്‍ വീടുകള്‍ ഉള്‍പ്പെടെയുള്ള അടിസ്ഥാന സൗകര്യങ്ങള്‍ ഏര്‍പ്പെടുത്തുന്നതിന് അനുമതി നല്‍കണമെന്ന് ആവശ്യപ്പെടുകയായിരുന്നു.
ഇതിന്റെ അടിസ്ഥാനത്തില്‍ സെക്ഷന്‍ 17-വിഭാഗം ഭൂമിയില്‍പ്പെട്ട ആദിവാസി ഗ്രാമങ്ങളില്‍ വീട്, റോഡ്, നടപ്പാത, വൈദ്യുതി തുടങ്ങിയ അടിസ്ഥാനത്തിലാണ് സൗകര്യങ്ങള്‍ ഏര്‍പ്പെടുത്താന്‍ കോടതി അനുമതി നല്‍കിയത്. മാസം തോറും സുപ്രിംകോടതിയില്‍ കേസുമായി ബന്ധപ്പെട്ട് താന്‍ ഹാജരാകുന്നുണ്ടെന്നും സെക്ഷന്‍ 17-വിഭാഗം പ്രശ്‌നത്തിന് ഉടന്‍ തന്നെ പരിഹാരം ഉണ്ടാകുമെന്നാണ് പ്രതീക്ഷിക്കുന്നതെന്നും കലക്ടര്‍ പറഞ്ഞു.
ഗൂഡല്ലൂര്‍ എം.എല്‍.എ അഡ്വ. എം ദ്രാവിഡമണി, മുന്‍ മന്ത്രി എ. മില്ലര്‍, ടൗണ്‍ പഞ്ചായത്ത് അസിസ്റ്റന്റ് ഡയരക്ടര്‍ ഇന്‍ചാര്‍ജ് സുബ്രഹ്മണ്യന്‍, ദേവര്‍ഷോല പഞ്ചായത്ത് സെക്രട്ടറി ഗുണാലന്‍ ചടങ്ങില്‍ സംബന്ധിച്ചു.