കോഴിക്കോട്: വയനാട്ടിലെ ആദിവാസികളുടെ നേതാവായിരുന്ന കരിന്തണ്ടന്റെ ജീവിതം അഭ്രപാളിയിലെത്തുമ്പോള്‍ ചരിത്രത്തോട് നീതിപുലര്‍ത്തുന്നതാകും സിനിമയെന്ന് സംവിധായിക ലീലാ സന്തോഷ്. പ്രസ്‌ക്ലബിന്റെ മുഖാമുഖത്തില്‍ സംസാരിക്കുകയായിരുന്നു അവര്‍. ചരിത്രത്തില്‍ ഇടം പിടിക്കാത്തതും അധികമാരും അറിയാത്തതുമായ സംഭവബഹുലമായ ജീവിതമാണ് ആദ്യ ദലിത് സംവിധായിക അഭ്രപാളിയിലേക്കെത്തിക്കുന്നത്. വയനാട്ടിലെ പണിയ സമുദായത്തിലെ തലവനായിരുന്ന കരിന്തണ്ടനെ ബ്രിട്ടിഷുകാര്‍ ഒരു ചതിയിലൂടെ കൊലപ്പെടുത്തുകയായിരുന്നു. ഇദ്ദേഹം 1750 മുതല്‍ 1799 വരെയുള്ള കാലഘട്ടത്തില്‍ ജീവിച്ചിരുന്നതായി കരുതപ്പെടുന്നു.
കരിന്തണ്ടനെക്കുറിച്ച് ആധികാരികമായി പറയാന്‍ എഴുതപ്പെട്ട ചരിത്രമോ രേഖകളോ ഇല്ല. വയനാടന്‍ അടിവാരത്തുള്ള ചിപ്പിലിത്തോട് ഭാഗത്തു പണിയരെന്ന ആദിവാസി വിഭാഗത്തിന്റെ മൂപ്പനായിരുന്നു കരിന്തണ്ടന്‍. കറുത്ത പൊന്നും വനവിഭവങ്ങളും തേടിയെത്തിയ ബ്രിട്ടിഷുകാര്‍ക്ക് താമരശ്ശേരി അടിവാരം വരെ എത്താനായി. പിന്നീട് മലനിരകള്‍ തടസം നിന്നു. വയനാട്ടിലെ സുഗന്ധദ്രവ്യങ്ങള്‍ എളുപ്പത്തില്‍ കൈക്കലാക്കാനായി ഇറങ്ങിത്തിരിച്ച പലരും വന്യമൃഗങ്ങളുടെ ആക്രമണത്തിനിരയായി.
കരിന്തണ്ടനാണ് അവര്‍ക്കു പുതിയ വഴി തുറന്നുകൊടുത്തത്. ഈ പാത കരിന്തണ്ടന്‍ മറ്റാര്‍ക്കെങ്കിലും കാട്ടിക്കൊടുത്താലോ എന്നു കരുതിയ ബ്രിട്ടിഷുകാര്‍ അദ്ദേഹത്തെ ചതിയിലൂടെ കൊലപ്പെടുത്തിയെന്നാണ് വാമൊഴിക്കഥ. മുതിര്‍ന്നവര്‍ പറഞ്ഞുവച്ച കാര്യങ്ങളും കേട്ടറിഞ്ഞ കഥകളും ഒക്കെത്തന്നെയാണ് താന്‍ സിനിമക്കുവേണ്ടി ഉപയോഗിക്കുന്നതെന്ന് സംവിധായിക പറഞ്ഞു. കരിന്തണ്ടന്റെ കഥ എഴുതപ്പെടാത്ത ചരിത്രമാണെന്ന് അവര്‍ പറഞ്ഞു. പ്രസ്‌ക്ലബ് സെക്രട്ടറി വിപുല്‍നാഥ്, എ.വി ഫര്‍ദീസ് പങ്കെടുത്തു.