തലശ്ശേരി: ഗവ. ബ്രണ്ണന്‍ കോളജില്‍ പുറത്തിറക്കിയ മാഗസിന്‍ ദേശീയഗാനത്തെയും ദേശീയപതാകയെയും അപമാനിച്ചെന്ന് ആരോപണം. വിവാദം ഉയര്‍ന്നതിനെ തുടര്‍ന്ന് മാഗസിനിലെ വിവാദ ഭാഗം മാറ്റാന്‍ തീരുമാനിച്ചു. ബ്രണ്ണന്‍ കോളജിന്റെ 125ാം വാര്‍ഷികാഘോഷത്തിന്റെ ഭാഗമായി പെല്ലറ്റ് എന്ന പേരില്‍ എസ്.എഫ്.ഐ നേതൃത്വത്തിലുള്ള കോളജ് യൂനിയന്‍ പുറത്തിറക്കിയ മാഗസിനാണു വിവാദത്തിനു തിരികൊളുത്തിയത്.
സിനിമാ തിയറ്ററുകളില്‍ ദേശീയഗാനം കേള്‍പ്പിക്കുന്നതിനും ദേശീയപതാക കാണിക്കുന്നതിനുമെതിരേയാണു മാഗസിനില്‍ പ്രതിഷേധം. സിനിമാ തിയറ്ററില്‍  ദേശീയ ഗാനം മുഴങ്ങുമ്പോള്‍ ഒഴിഞ്ഞ കസേരകള്‍ക്കു പിന്നില്‍ ലൈംഗിക ബന്ധത്തിലേര്‍പ്പെട്ട സ്ത്രീ-പുരുഷ ചിത്രവും മാഗസിനിലുണ്ട്. ഇതിനു പുറമെ സത്രീ-പുരുഷ ലൈംഗിക അവയവങ്ങളുടെ കാര്‍ട്ടൂണ്‍ ചിത്രങ്ങളും സ്ഥാനം പിടിച്ചിട്ടുണ്ട്. ഇന്ത്യന്‍ സൈന്യത്തെ അധിക്ഷേപിക്കുന്നതായും പരാതി ഉയര്‍ന്നിട്ടുണ്ട്. സംഭവം വിവാദമായതോടെ ഇന്നലെ സ്റ്റാഫ് കൗണ്‍സില്‍ യോഗം ചേര്‍ന്ന് വിവാദമായ ചിത്രങ്ങള്‍ ഉള്‍പ്പെടെ പ്രസിദ്ധീകരിച്ച മാഗസിനിലെ 12, 84 പേജുകള്‍ ഒഴിവാക്കാന്‍ തീരുമാനിക്കുകയായിരുന്നു.
1500 ലേറെ കോപ്പികള്‍ ഇതിനകം തന്നെ വിതരണം ചെയ്തു കഴിഞ്ഞിട്ടുണ്ട്. വിവാദ  മാഗസിനെതിരേ പ്രതിപക്ഷ വിദ്യാര്‍ഥി സംഘടനകളും രംഗത്തെത്തി.