ന്യൂഡല്‍ഹി: റാഫേല്‍ ഇടപാടുമായി ബന്ധപ്പെട്ട് അന്വേഷണം തുടങ്ങിയാല്‍ അത് മോദിക്ക് അതിജീവിക്കാനാകില്ലെന്ന് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി. റാഫേല്‍ ഇടപാടില്‍ ദസോള്‍ ഏവിയേഷനില്‍ നിന്ന് അനില്‍ അംബാനിയുടെ സ്ഥാപനം കോഴ കൈപ്പറ്റിയിട്ടുണ്ടെന്ന കാര്യം വ്യക്തമാണെന്നും അദ്ദേഹം ആരോപിച്ചു.
പ്രധാനമന്ത്രി നരേന്ദ്ര മോദിയെ സംരക്ഷിക്കുന്നതിനായി ഫ്രഞ്ച് കമ്പനിയായ ദസോള്‍ ഏവിയേഷന്‍ സി.ഇ.ഒ കള്ളം പറയുകയാണെന്നും രാഹുല്‍ പറഞ്ഞു. ഇടപാടുമായി ബന്ധപ്പെട്ട അന്വേഷണം വരികയാണെങ്കില്‍ അതിനെ അതിജീവിക്കാന്‍ മോദിക്ക് ഒരിക്കലും കഴിയില്ല. ഇടപാടില്‍ അഴിമതി വ്യക്തമാണെന്നും ഇതുമായി ബന്ധപ്പെട്ട് മോദിയുടെ നിര്‍ദേശപ്രകാരം അനില്‍ അംബാനിക്ക് 30,000 കോടി രൂപ കൈമാറിയിട്ടുണ്ടെന്നതിന് വ്യക്തമായ തെളിവുണ്ടെന്നും രാഹുല്‍ ആവര്‍ത്തിച്ചു.
അനില്‍ അംബാനിയുടെ റിലയന്‍സ് കമ്പനിയില്‍ ദസോള്‍ ഏവിയേഷന്‍ 284 കോടി രൂപ നിക്ഷേപിച്ചിട്ടുണ്ട്. ഇത് വ്യക്തമാണെങ്കിലും ദസോള്‍ ഏവിയേഷന്‍ സി.ഇ.ഒ ഇക്കാര്യം ഒളിച്ചുവക്കുകയാണ്. നഷ്ടത്തില്‍ പോകുന്ന ഒരു കമ്പനിയില്‍ എന്തിനാണ് ദസോള്‍ 284 കോടി നിക്ഷേപിച്ചതെന്നും രാഹുല്‍ ചോദിച്ചു.
യുദ്ധവിമാന കരാറില്‍ പൊതുമേഖലാ സ്ഥാപനമായ എച്ച്.എ.എല്ലിനെ മറികടന്ന് റിലയന്‍സിനെ പങ്കാളിയാക്കിയത് അവര്‍ക്ക് ആവശ്യത്തിന് ഭൂമിയുണ്ടെന്ന വാദം ചൂണ്ടിക്കാട്ടിയിട്ടാണ്. ഇക്കാര്യമാണ് ദസോള്‍ സി.ഇ.ഒ പറയുന്നത്. എന്നാല്‍ ദസോള്‍ പണം നല്‍കിയ ശേഷമാണ് റിലയന്‍സ് ഭൂമി വാങ്ങിയതെന്നും മാധ്യമ വാര്‍ത്തകളെ ഉദ്ധരിച്ചുകൊണ്ട് രാഹുല്‍ വ്യക്തമാക്കി. പാരിസില്‍ നടത്തിയ വാര്‍ത്താ സമ്മേളനത്തിലാണ് റിലയന്‍സിനെ പങ്കാളിയാക്കിയത് അവര്‍ക്ക് എയര്‍ ഫീല്‍ഡിനടുത്ത് ഭൂമിയുണ്ടെന്ന് കണ്ടതിനെ തുടര്‍ന്നാണെന്ന് ദസോള്‍ ഏവിയേഷന്‍ കമ്പനി സി.ഇ.ഒ എറിക് ട്രാപ്പിയര്‍ പറഞ്ഞത്. എന്നാല്‍ ഇത് ശരിയല്ലെന്ന് വ്യക്തമാണ്. ഇക്കാര്യത്തെക്കുറിച്ച് അന്വേഷണം തുടങ്ങിയതോടെയാണ് കേന്ദ്ര സര്‍ക്കാര്‍ സി.ബി.ഐ ഡയരക്ടറെ മാറ്റിയതെന്നും രാഹുല്‍ ആരോപിച്ചു.