തിരൂര്‍: മന്ത്രിമാരും എം.എല്‍.എമാരും മറ്റു ജനപ്രതിനിധികളും സ്ഥിരമായെത്തുന്ന തിരൂര്‍ റെസ്റ്റ് ഹൗസ് കെട്ടിടത്തില്‍നിന്നു പാമ്പുകളെ പിടികൂടി. റെസ്റ്റ് ഹൗസിലെ വി.ഐ.പി റൂമില്‍നിന്നാണ് ഇന്നലെ രാവിലെ മൂന്നു പാമ്പുകളെ പിടികൂടിയത്.

റെസ്റ്റ് ഹൗസിലെ ശുചീകരണ ചുമതലയുള്ള വനിതാ ജീവനക്കാരി മുറി വൃത്തിയാക്കാനെത്തിയപ്പോഴാണ് രാവിലെ പത്തോടെ പാമ്പുകളെ കണ്ടത്. ഉടന്‍തന്നെ റെസ്റ്റ് ഹൗസ് വാച്ചറെ വിവരമറിയിക്കുകയായിരുന്നു. തുടര്‍ന്ന് ഉച്ചയോടെ പാമ്പുപിടുത്തക്കാരനായ ഹംസയെത്തി പാമ്പുകളെ പിടികൂടി കൊണ്ടുപോയി. പെരുമ്പാമ്പ് വര്‍ഗത്തില്‍പ്പെട്ട കറുത്ത മണ്‍പാമ്പ്, വെള്ളിക്കോല്‍ വരയന്‍ ഇനത്തില്‍പ്പെട്ട മൂന്നു പാമ്പുകളെയാണ് റെസ്റ്റ് ഹൗസിനുള്ളില്‍ കണ്ടെത്തിയത്. പിടികൂടിയ പാമ്പുകളെ വനംവകുപ്പിനു കൈമാറും.