ശ്രീനഗര്‍: ജമ്മുകശ്മിരിലെ ഷോപ്പിയാന്‍ ജില്ലയിലുണ്ടായ ഏറ്റുമുട്ടലില്‍ രണ്ടു ഹിസ്ബുല്‍ മുജാഹിദീന്‍ ഭീകരര്‍ കൊല്ലപ്പെട്ടതായി സൈന്യം അറിയിച്ചു. കഴിഞ്ഞ ദിവസം അര്‍ധരാത്രിയോടെയായിരുന്നു ഏറ്റുമുട്ടലുണ്ടായത്.
സ്ഥലത്തു ഭീകരസാന്നിധ്യമുണ്ടെന്ന റിപോര്‍ട്ടിനെ തുടര്‍ന്നു കഴിഞ്ഞ ദിവസം വൈകിട്ടോടെ സൈന്യം തിരച്ചില്‍ തുടങ്ങിയിരുന്നു.
രാത്രി തിരച്ചില്‍ തുടരുമ്പോള്‍ ഭീകരര്‍ വെടിവയ്പ് നടത്തുകയായിരുന്നെന്നാണ് ഔദ്യോഗിക വിശദീകരണം.
തുടര്‍ന്നു സൈന്യവും പ്രത്യാക്രമണം നടത്തി. ഇതിലാണ് രണ്ടു പേര്‍ കൊല്ലപ്പെട്ടത്. ഏറ്റുമുട്ടലുണ്ടായ പ്രദേശത്തുനിന്നു രണ്ടിലേറെ ഭീകരര്‍ രക്ഷപ്പെട്ടതായും വിവരമുണ്ട്.
ഇവിടെനിന്ന് വിവിധ തരത്തിലുള്ള ആയുധങ്ങള്‍ കണ്ടെത്തിയതായും സൈന്യം അറിയിച്ചു. മുഹമ്മദ് ഇര്‍ഫാന്‍ ഭട്ട്, ഷാഹിദ് മിര്‍ എന്നിവരാണ് കൊല്ലപ്പെട്ടതെന്നു സ്ഥിരീകരിച്ചിട്ടുണ്ട്.