ലണ്ടന്‍: ഇംഗ്ലീഷ് ഫുട്‌ബോള്‍ ലീഗ് കപ്പിലെ പ്രീക്വാര്‍ട്ടറില്‍ കരുത്തരായ ടോട്ടനം ഞെട്ടിക്കുന്ന തോല്‍വി വഴങ്ങിയപ്പോള്‍ മാഞ്ചസ്റ്റര്‍ സിറ്റിയും ആഴ്‌സനലും വമ്പന്‍ ജയം സ്വന്തമാക്കി.
നാലാം ഡിവിഷന്‍ മാത്രം കളിക്കുന്ന കോള്‍ചെസ്റ്ററാണ് ടോട്ടനത്തെ വീഴ്ത്തിയത്. പെനല്‍റ്റി ഷൂട്ടൗട്ടില്‍ 3-4നായിരുന്നു ടോട്ടനത്തിന്റെ പരാജയം. നിശ്ചിത സമയത്ത് ഇരുടീമിനും ഗോള്‍ നേടാനായില്ല. മത്സരത്തില്‍ 75 ശതമാനവും പന്ത് കൈവശം വെച്ചത് ടോട്ടനമാണ്.
19 തവണ ഗോളാക്രമണവും നടത്തിയെങ്കലും ഫലം മാത്രം കണ്ടില്ല. ഹാരി കെയ്ന്‍ ഇല്ലാതെ ഇറങ്ങിയ ടോട്ടനം നിരയില്‍ ഒരുപിടി യുവതാരങ്ങള്‍ ഇടം നേടി. രണ്ടാം മിനുട്ടില്‍ ഹ്യു മിന്‍ സണ്ണിനേയും ക്രിസ്റ്റ്യന്‍ എറിക്‌സനേയും എറിക് ലമേലയേയുമൊക്കെ ഗോള്‍ കണ്ടെത്താനായി ഇറക്കിയെങ്കിലും ഗോള്‍ പിറക്കാതിരുന്നതോടെ മത്സരം പെനല്‍റ്റി ഷൂട്ടൗട്ടിലേക്ക് നീളുകയായിരുന്നു.
ഡെലെ അലിയും എറിക് ലമേലയും ഹ്യു മിന്‍ സണ്ണും ടോട്ടനത്തിനായി ലക്ഷ്യം കണ്ടപ്പോള്‍ ക്രിസ്റ്റ്യന്‍ എറിക്‌സന്‍, ലൂക്കാസ് മൗറ എന്നിവര്‍ പെനല്‍റ്റി പാഴാക്കി. കോള്‍ചെസ്റ്ററിന്റെ ജെവാനി ബ്രൗണിന്റെ പെനല്‍റ്റിയും പാഴായി. ലീഗ് കപ്പില്‍ ആദ്യമായാണ് കോള്‍ചെസ്റ്റര്‍ നാലാം റൗണ്ടിലേക്ക് മുന്നേറുന്നത്.
പ്രസ്റ്റന്‍ നോര്‍ത്ത് എന്‍ഡിനെതിരേ 3-0നായിരുന്നു സിറ്റിയുടെ ജയം. റഹീം സ്റ്റര്‍ലിങ് (19), ഗബ്രിയേല്‍ ജീസസ് (35) എന്നിവര്‍ ലക്ഷ്യം കണ്ടപ്പോള്‍ റയന്‍ ലെഡ്‌സണിന്റെ സെല്‍ഫ് ഗോളും സിറ്റിക്ക് തുണയായി. അതേസമയം, ആഴ്‌സനല്‍ 5-0ന് നോട്ടിങ്ഹാം ഫോറസ്റ്റിനെ തകര്‍ത്തു വിടുകയായിരുന്നു. ഗബ്രിയേല്‍ മാര്‍ട്ടിനെല്ലി (31, 90+2) ഇരട്ടഗോള്‍ നേടി.