തിരുവനന്തപുരം: പശ്ചിമേഷ്യയില്‍ നിലനില്‍ക്കുന്ന യുദ്ധഭീതി സംസ്ഥാനത്ത് നടക്കുന്ന നിയമസഭ തെരഞ്ഞെടുപ്പിനെയും ബാധിക്കുന്നു. പട്ടികയില്‍ ഇടംപിടിച്ച പ്രവാസി വോട്ടര്‍മാര്‍ക്ക് പലര്‍ക്കും നാട്ടിലെത്തി വോട്ടുചെയ്യാന്‍ കഴിയുമോയെന്ന ആശങ്ക ഉയരുന്നുണ്ട്. ഏറ്റവും കൂടുതല്‍ പ്രവാസി വോട്ടര്‍മാരുള്ള ഗള്‍ഫ് മേഖലയില്‍ നിന്നും വിമാന സര്‍വിസുകള്‍ പൂര്‍ണമായും പുനഃസ്ഥാപിക്കാന്‍ കഴിയാത്തതിനാല്‍ യാത്രകള്‍ പ്രതിസന്ധിയിലാണ്. തെരഞ്ഞെടുപ്പിന് ചുരുങ്ങിയ ദിവസങ്ങള്‍ മാത്രം ബാക്കിനില്‍ക്കെ നിലവില്‍ സര്‍വിസ് നടത്തുന്ന വിമാനങ്ങളില്‍ പോലും ടിക്കറ്റ് തരപ്പെടുത്തുക പ്രയാസകരമാണ്.

ടിക്കറ്റ് ലഭ്യമായാല്‍ തന്നെ അടിക്കടി വിമാന സര്‍വിസുകള്‍ റദ്ദാക്കുന്നത് മടക്കയാത്രയ്ക്ക് ഉള്‍പ്പെടെ പ്രയാസം നേരിടുമോയെന്ന ആശങ്കയും ഉടലെടുത്തിട്ടുണ്ട്. കൂടാതെ ലഭ്യമായ ടിക്കറ്റിലെ നിരക്ക് വര്‍ധനവും പ്രവാസികളെ വലയ്ക്കുന്നുണ്ട്. ചരിത്രത്തില്‍ ആദ്യമായി ഏറ്റവും കൂടുതല്‍ പ്രവാസികള്‍ വോട്ടര്‍പട്ടികയില്‍ ഇടംപിടിച്ച തെരഞ്ഞെടുപ്പാനാണ് വരാനിരിക്കുന്നത്. നിലവില്‍ 1,98,047 പുരുഷന്‍മാരും 3,59,94 സ്ത്രീകളും എട്ട് ട്രാന്‍സ്‌ജെന്‍ഡേഴ്‌സും ഉള്‍പ്പെടെ 2,34,049 പ്രവാസികളാണ് ഇത്തവണത്തെ വോട്ടര്‍പട്ടികയിലുള്ളത്. ഏറ്റവും കൂടുതല്‍ പ്രവാസി വോട്ടര്‍മാരുള്ളത് കോഴിക്കോടാണ്.