പരപ്പനങ്ങാടി: തോട്ടില്‍ കൂട്ടുകാരോടൊപ്പം കുളിക്കുന്നതിനിടെ മുങ്ങിത്താഴ്ന്ന എട്ടു വയസുകാരനെ രക്ഷിച്ച വിദ്യാര്‍ഥിക്ക് അഭിനന്ദനപ്രവാഹം. നെടുവയിലെ പരേതനായ കാട്ടുങ്ങല്‍ കടുങ്ങാഞ്ചേരി ശിവദാസന്റെയും അനിതയുടെയും മകനും അരിയല്ലൂര്‍ മാധവാനന്ദവിലാസം സ്‌കൂളിലെ പത്താംക്ലാസ് വിദ്യാര്‍ഥിയുമായ അഭിനവാണ് ശ്രദ്ധാകേന്ദ്രം.
കഴിഞ്ഞ ദിവസം വൈകിട്ട് വീടിനുത്തുള്ള പച്ചരിപ്പാടം തോട്ടില്‍ കുളിക്കാനിറങ്ങിയ നെടുവ ഗവ. ഹൈസ്‌കൂളിലെ മൂന്നാംക്ലാസ് വിദ്യാര്‍ഥിയും കാടശേരി അരുണ്‍-സതി ദമ്പതികളുടെ മകനുമായ അനന്തുവാണ് തോട്ടിലെ ഒഴുക്കില്‍പ്പെട്ടത്. അനന്തു മുങ്ങിത്താഴുന്നതു കണ്ടു സ്ത്രീകളും കുട്ടികളും ബഹളംവച്ചെങ്കിലും രക്ഷിക്കാനായില്ല. തുടര്‍ന്നാണ് അതുവഴി വന്ന അഭിനവ് നിറഞ്ഞുകവിഞ്ഞ തോട്ടിലേക്ക് എടുത്തുചാടി അനന്തുവിനെ കൈകളില്‍ പിടിച്ചു കരയിലെ പുല്‍പടര്‍പ്പുകളിലേക്ക് എത്തിച്ചത്. കോഴിക്കോട് മെഡിക്കല്‍ കോളജ് തീവ്രപരിചരണ വിഭഗത്തില്‍ പ്രവേശിപ്പിച്ച അനന്തുവിനെ ഇന്നലെ വാര്‍ഡിലേക്കു മാറ്റി.