മലപ്പുറം: കന്നുകാലി അറവുനിരോധനത്തിനെതിരേ കേന്ദ്ര സര്‍ക്കാര്‍ കൊണ്ടുവന്ന ചട്ടഭേദഗതി സംസ്ഥാനത്തിന്റെ അധികാരത്തിന്മേലുള്ള കടന്നുകയറ്റമാണെന്ന് എല്‍.ഡി.എഫ് ജില്ലാ കമ്മിറ്റി. മനുഷ്യന്‍ എന്തു ഭക്ഷിക്കണമെന്നു ഭരണകൂടം നിര്‍ദേശിക്കുന്ന ഫാസിസ്റ്റ് നീക്കത്തിനെതിരേ ശക്തമായ പ്രക്ഷോഭ പരിപാടികള്‍ സംഘടിപ്പിക്കാന്‍ യോഗം തീരുമാനിച്ചു.
ഇതോടനുബന്ധിച്ചു 22നു രാവിലെ പത്തിനു മലപ്പുറം ദൂരദര്‍ശന്‍ കേന്ദ്രത്തിലേക്കു മാര്‍ച്ച് നടത്തും. വാഴയൂര്‍ പഞ്ചായത്തില്‍ ബി.ജെ.പി-ആര്‍.എസ്.എസ് പ്രവര്‍ത്തകര്‍ നടത്തിയ അക്രമ പ്രവര്‍ത്തനങ്ങളെ യോഗം അപലപിച്ചു. പി.പി വാസുദേവന്‍ അധ്യക്ഷനായി. പി.പി സുനീര്‍ റിപ്പോര്‍ട്ട് അവതരിപ്പിച്ചു. ടി.കെ ഹംസ, ഇ.എന്‍ മോഹന്‍ദാസ്, വി. ശശികുമാര്‍, പി. സുബ്രഹ്മണ്യന്‍, കെ. മോഹന്‍ദാസ്, പി.എം സഫറുള്ള, കവറൊടി മുഹമ്മദ്, പി.ജെ ആന്റണി, പുലിയോടന്‍ മുഹമ്മദ്, മഠത്തില്‍ സാദിഖലി സംസാരിച്ചു.