ബംഗളൂരു: വിജയ് ഹസാരെ ട്രോഫി ഏകദിന ക്രിക്കറ്റ് ടൂര്‍ണമെന്റില്‍ തോല്‍വിയോടെ തുടങ്ങി കേരളം. കരുത്തരായ സൗരാഷ്ട്രയോട് കേരളം പ്രതിരോധിച്ച് പരാജയപ്പെടുകയായിരുന്നു. മഴ മൂലം 34 ഓവറാക്കി ചുരുക്കിയ മത്സരത്തില്‍ ടോസ് നേടിയ സൗരാഷ്ട്ര പിച്ച് മുതലെടുത്ത് കേരളത്തിനെ ബാറ്റിങിനയക്കുകയായിരുന്നു. ആദ്യം ബാറ്റ് ചെയ്ത കേരളം ഒന്‍പത് വിക്കറ്റ് നഷ്ടത്തില്‍ 186 റണ്‍സെടുത്തപ്പോള്‍ അവസാന രണ്ട് പന്ത് ബാക്കി നില്‍ക്കേ ഏഴിന് 187 റണ്‍സെടുത്ത് സൗരാഷ്ട്ര വിജയം കണ്ടു. അര്‍പ്രീത് വാസവടയുടെ(85 പന്തില്‍ 92*) അപരാജിത ചെറുത്തുനില്‍പ്പാണ് കേരളത്തിന്റെ വിജയപ്രതീക്ഷ തട്ടിത്തെറിപ്പിച്ചത്.
മികച്ച തുടക്കത്തിന് ശേഷമായിരുന്നു കേരളത്തിന്റെ തകര്‍ച്ച. ഓപ്പണര്‍മാരായ വിഷ്ണു വിനോദിന്റേയും(41 പന്തില്‍ 40) വിനൂപ് മനോഹരന്റേയും(30 പന്തില്‍ 47) കൂട്ടുകെട്ട് കേരളത്തിന് മികച്ച അടിത്തറ പാകിയെങ്കിലും പിന്നീടെത്തിയവരില്‍ ആര്‍ക്കും കാര്യമായി തിളങ്ങാനായില്ല. ഇരുവരും ചേര്‍ന്ന് 88 റണ്‍സാണ് പടുത്തുയര്‍ത്തിയത്. കേരളത്തിനായി അരങ്ങേറ്റം കുറിച്ച നായകന്‍ റോബിന്‍ ഉത്തപ്പ ഒന്‍പത് റണ്‍സെടുത്ത് പുറത്തായി. മുന്‍ നായകന്‍ സച്ചിന്‍ ബേബി 26 റണ്‍സും സഞ്ജു സാംസണ്‍ 16 റണ്‍സുമെടുത്തു.
വിജയലക്ഷ്യം പിന്തുടര്‍ന്ന സൗരാഷ്ട്രയെ തുടക്കം തന്നെ കേരള ബൗളര്‍മാര്‍ തകര്‍ച്ചയിലേക്ക് തള്ളിയിട്ടു. 25 റണ്‍സെടുക്കുന്നതിനിടെ മൂന്ന് വിക്കറ്റുകളാണ് അവര്‍ക്ക് നഷ്ടമായത്. എന്നാല്‍ ഈ തകര്‍ച്ചയില്‍നിന്ന് പതുക്കെ അവര്‍ കരകയറി. അഞ്ചാമനായിറങ്ങിയ വാസവടയിലൂടെ സൗരാഷ്ട്ര ജയം നേടി. കേരളത്തിന് വേണ്ടി സന്ദീപ് വാര്യര്‍, ബേസില്‍ തമ്പി, ആസിഫ് എന്നിവര്‍ രണ്ട് വീതം വിക്കറ്റുകള്‍ വീഴ്ത്തി.