കോട്ടയം:പാലാ ഉപതെരഞ്ഞെടുപ്പില്‍ യു.ഡി.എഫിനെതിരേ വാളെടുത്ത് വി.എം സുധീരന്‍. യു.ഡി.എഫ് നേതൃത്വത്തിന് ജനങ്ങള്‍ നല്‍കിയ താക്കീതാണ് തെരഞ്ഞെടുപ്പ് ഫലം. ഞെട്ടിക്കുന്ന തോല്‍വിയാണ് ഉണ്ടായത്. വന്‍ തിരിച്ചടിയാണ് നേരിട്ടതെന്നും സുധീരന്‍ കുറ്റപ്പെടുത്തി. യു.ഡി.എഫ് നേതാക്കളുടെ മനോഭാവം മാറണമെന്നും അദ്ദേഹം പ്രതികരിച്ചു. യു.ഡി.എഫ് രാഷ്ട്രീയ നേതൃത്വത്തിന്റെ മൈന്‍ഡ് സെറ്റില്‍ മാറ്റം ഉണ്ടാകേണ്ട ആവശ്യകതയാണ് സന്ദേശത്തിലൂടെ ജനങ്ങള്‍ നല്‍കിയതെന്നും സുധീരന്‍ പ്രതികരിച്ചു.
ഇടതുപക്ഷ ജനാധിപത്യമുന്നണിപോലും ആത്മവിശ്വാസത്തോടെയായിരുന്നില്ല മുന്നോട്ട് പോയത്. ഈ പരാജയം എങ്ങനെ സംഭവിച്ചു എന്നതില്‍ സത്യസന്ധമായ പരിശോധന ആവശ്യമാണ്.

തെരഞ്ഞെടുപ്പ് ഫലത്തില്‍ വിമര്‍ശനവുമായി എന്‍.കെ പ്രേമചന്ദ്രനും രംഗത്തെത്തി. യു.ഡി.എഫ് ചോദിച്ചുവാങ്ങിയ തോല്‍വിയാണിതെന്ന് അദ്ദേഹം പറഞ്ഞു. യു.ഡി.എഫിന്റെ സംഘടനാദൗര്‍ബല്യം തിരിച്ചടിയാണിത്. ഗൗരവത്തോടെ കണ്ടില്ലെങ്കില്‍ ഇനിയും തിരിച്ചടിയുണ്ടാകുമെന്നും അദ്ദേഹം മുന്നറിയിപ്പ് നല്‍കി.
ഇതുവരെ മറിച്ചൊന്ന് ചിന്തിക്കാതെ കേരളാ കോണ്‍ഗ്രസിനും മാണിക്കും ഒപ്പം നിന്ന പാലാ കെ.എം മാണിയുടെ മരണത്തോടെ അവരെ കൈവിട്ടതായും പ്രേമചന്ദ്രന്‍ പറഞ്ഞു.