വാഷിങ്ടണ്‍: ഖാംനഈയുടെ രക്തസാക്ഷിത്വത്തിന് പകരം വീട്ടുമെന്ന് പ്രഖ്യാപിച്ച് ഇറാന്‍. ഇസ്‌റാഈല്‍ നേരിടാന്‍ പോവുന്നത് ചരിത്രത്തിലെ ഏറ്റവും വിനാശകരമായ തിരിച്ചടിയെന്ന് ഇറാന്‍ മുന്നറിയിപ്പു നല്‍കുന്നു. ഖാംനഈയുടെ കൊലയാളികളോട് പ്രതികാരം ചെയ്യണമെന്ന് ഇറാന്റെ ഇസ്‌ലാമിക് റെവല്യൂഷനറി ഗാര്‍ഡ് ആഹ്വാനം ചെയ്തു. 

''ഞങ്ങള്‍ക്ക് ഒരു മികച്ച നേതാവിനെ നഷ്ടപ്പെട്ടിരിക്കുന്നു, അദ്ദേഹത്തിന്റെ വിയോഗത്തില്‍ അനുശോചിക്കുന്നു. മനുഷ്യരാശി കണ്ട ഏറ്റവും ക്രൂരരും ഭീകരരുമായ കൊലയാളികളുടെ കൈകളാല്‍ ഖാംനഈ വരിച്ച രക്തസാക്ഷിത്വം, മഹാനായ നേതാവിന്റെ വിശ്വാസ്യതയുടെയും അദ്ദേഹത്തിന്റെ ആത്മാര്‍ത്ഥമായ സേവനങ്ങള്‍ അംഗീകരിക്കപ്പെട്ടതിന്റെയും അടയാളമാണ്. ഇറാനിയന്‍ ജനതയുടെ പ്രതികാരത്തിന്റെ കൈകള്‍... ആ കൊലയാളികളെ വെറുതെ വിടില്ല'- ഐആര്‍ജിസി താക്കീത് ചെയ്യുന്നു. 

ALSO READ: ഖാംനഈ രക്തസാക്ഷിയായി; സ്ഥിരീകരിച്ച് ഇറാൻ; രാജ്യത്ത് ദുഃഖാചരണം പ്രഖ്യാപിച്ചു

'ഇസ്‌ലാമിക് റെവല്യൂഷണറി ഗാര്‍ഡ് കോര്‍പ്സ്, ഇസ്‌ലാമിക് റിപ്പബ്ലിക് ഓഫ് ഇറാന്റെ സായുധ സേനകള്‍, വിശാലമായ ജനകീയ ബാസിജ് സേനകള്‍ എന്നിവ അവരുടെ നേതാവിന്റെ പാത പിന്തുടരും. ആന്തരികവും ബാഹ്യവുമായ ഗൂഢാലോചനകള്‍ക്കെതിരെ ഉറച്ചുനില്‍ക്കുന്നതിലും, ഇസ് ലാമിക മാതൃരാജ്യത്തിനെതിരായ ആക്രമണകാരികള്‍ക്ക് പാഠം പഠിപ്പിക്കുന്ന ശിക്ഷ നല്‍കുന്നതിലും അദ്ദേഹത്തിന്റെ പാരമ്പര്യം കാത്തുസൂക്ഷിക്കും'- അവര്‍ കുറിപ്പില്‍ അറിയിക്കുന്നു.

ഈ 'വലിയ കുറ്റകൃത്യത്തിന് ഒരിക്കലും ഉത്തരം ലഭിക്കാതെ പോവില്ല' ഇറാന്റെ മന്ത്രിസഭയും മുന്നറിയിപ്പ് നല്‍കുന്നു.

ഖാംനഈ കൊല്ലപ്പെട്ടതായി ഇന്ന് രാവിലെയാണ് ഇറാന്‍ ഔദ്യോഗികമായി സ്ഥിരീകരിക്കുന്നത്. 1989 മുതല്‍ ഇറാന്റെ പരമോന്നത നേതാവാണ് ആയത്തുല്ല അലി ഖാംനഈ. ഇറാനില്‍ 40 ദിവസത്തെ ദുഃഖാചരണം പ്രഖ്യാപിച്ചിട്ടുണ്ട്. ഏഴ് ദിവസം ഓഫിസുകള്‍ക്ക് അവധിയും പ്രഖ്യാപിച്ചു.

ഖാംനഈ കൊല്ലപ്പെട്ടന്ന് ഇസ്‌റാഈലും അമേരിക്കയും നേരത്തെ അവകാശപ്പെട്ടിരുന്നു. എന്നാല്‍ ഇക്കാര്യത്തില്‍ ഇറാന്‍ സ്ഥിരീകരണം നല്‍കിയിരുന്നില്ല. ഖാംനഈയുടെ മകളും ഭര്‍ത്താവും കൊച്ചുമകനും ആക്രമണത്തില്‍ കൊല്ലപ്പെട്ടിട്ടുണ്ട്.

ran confirms the assassination of ayatollah ali khamenei and announces 40 days of national mourning. irgc warns of severe retaliation against israel, calling it a historic and devastating response.