കോട്ടയം: കന്യാസ്ത്രീ പീഡനക്കേസില്‍ അന്വേഷണസംഘം ആവശ്യപ്പെട്ട ലാപ്‌ടോപ് ഹാജരാക്കാത്തതിനാല്‍ ഫ്രാങ്കോ മുളയ്ക്കലിനെതിരേ തെളിവ് നശിപ്പിക്കല്‍ വകുപ്പ് കൂടി ചേര്‍ക്കാന്‍ നീക്കം. കേസിലെ പ്രധാനപ്പെട്ട തെളിവുകളടങ്ങിയ ലാപ്‌ടോപ് ഈമാസം അഞ്ചിന് മുന്‍പ് ഹാജരാക്കാനായിരുന്നു അന്വേഷണത്തിന് നേതൃത്വം നല്‍കുന്ന വൈക്കം ഡിവൈ.എസ്.പി കെ. സുഭാഷ് നോട്ടിസ് അയച്ചത്. എന്നാല്‍ അന്വേഷണസംഘം ആവശ്യപ്പെട്ട ലാപ്‌ടോപ് ഏതെന്ന് കണ്ടെത്താനായില്ലെന്നായിരുന്നു ഫ്രാങ്കോയുടെ മറുപടി. ജലന്ധര്‍ രൂപതയുടെ ഓഫിസിലെ ലാപ്‌ടോപുകള്‍ നേരത്തെ സര്‍വിസ് ചെയ്തിരുന്നു. അന്വേഷണസംഘം ആവശ്യപ്പെട്ട ലാപ്‌ടോപ് ഏതെന്ന് കണ്ടെത്താനായില്ലെന്നും കിട്ടുന്നമുറയ്ക്ക് ഹാജരാക്കുമെന്നുമാണ് നോട്ടിസിന് നല്‍കിയ മറുപടിയില്‍ ഫ്രാങ്കോ മുളയ്ക്കല്‍ പറഞ്ഞത്.
ഇതോടെ ഫ്രാങ്കോയ്‌ക്കെതിരേ നിയമ നടപടിയുമായി മുന്നോട്ടുപോവാന്‍ പൊലിസ് തീരുമാനിക്കുകയായിരുന്നു. ലാപ്‌ടോപ് ഹാജരാക്കിയാല്‍ ഈ വകുപ്പ് ഒഴിവാക്കുമെന്ന് ഡിവൈ.എസ്.പി കെ. സുഭാഷ് വ്യക്തമാക്കി. ലാപ്‌ടോപ് ഹാജരാക്കാന്‍ കര്‍ശന നിര്‍ദേശം നല്‍കിയിരുന്നതായും അദ്ദേഹം വ്യക്തമാക്കി.