സുല്‍ത്താന്‍ ബത്തേരി: ആവശ്യത്തിന് ഡോക്ടര്‍മാരെ നിയമിക്കണമെന്നാവശ്യപ്പെട്ട് സുല്‍ത്താന്‍ ബത്തേരി താലൂക്ക് ആശുപത്രിയിലെ ഡോക്ടര്‍മാര്‍ സമരത്തിനൊരുങ്ങുന്നു. ആവശ്യത്തിന് ഡോക്ടര്‍മാരില്ലാതെ ആശുപത്രിയുടെ പ്രവര്‍ത്തനം താളം തെറ്റിയ സാഹചര്യത്തിലാണ് കെ.ജി.എം.ഒ.എയുടെ നേതൃത്വത്തില്‍ ഡോക്ടര്‍മാരുടെ സമര പ്രഖ്യാപനം.
1960ലെ ജനസംഖ്യക്ക് ആനുപാതികമായ സ്റ്റാഫ് പാറ്റേണാണ് താലൂക്ക് ആശുപത്രിയില്‍ നിലവിലുള്ളത്. 40 ഡോക്ടര്‍മാര്‍ വേണ്ടിടത്ത് 21 തസ്തികകള്‍ മാത്രമാണ് ഇവിടെയുള്ളത്. നിലവില്‍ 10 ഡോക്ടര്‍മാര്‍ മാത്രമാണ് ആശുപത്രിയിലുള്ളത്. സ്‌പെഷ്യാലിറ്റിയിലടക്കം 11 തസ്തകകള്‍ ഒഴിഞ്ഞു കിടക്കുകയാണ്. രണ്ടു മാസത്തോളമായി ആശുപത്രിയിലെ ഗൈനക്കോളജി വിഭാഗത്തിന്റെ പ്രവര്‍ത്തനവും താളം തെറ്റിയിരിക്കുകയാണ്. ദിവസവും 1500ഓളം രോഗികളാണ് ആശുപത്രിയില്‍ ചികിത്സ തേടിയെത്തുന്നത്. 10 ഡോക്ടര്‍മാര്‍ക്ക് ഇത്രയും രോഗികളെ പരിശോധിക്കാന്‍ പോലും കഴിയാത്ത സാഹചര്യമാണുള്ളത്.
ഈ സാഹചര്യത്തിലാണ് സമരത്തിന് തീരുമാനിച്ചതെന്ന് കെ.ജി.എം.ഒ.എ ഭാരവാഹകള്‍ പറഞ്ഞു. സമരത്തിന്റെ ആദ്യഘട്ടമെന്ന നിലയില്‍ അടുത്ത ആഴ്ച മുതല്‍ സ്‌പെഷ്യലിറ്റി ഒ.പികള്‍ ഒഴിവാക്കി ജനറല്‍ ഒ.പി നടത്താനും തുടര്‍ന്നും പരിഹാരമായില്ലങ്കില്‍ പൊതുജങ്ങളെക്കൂടി ഉള്‍പ്പെടുത്തി കൂടതല്‍ ശക്തമായ സംരവുമായി രംഗത്ത് വരാനുമാണ് സംഘടനയുടെ തീരുമാനം.