കൊല്ലം: പട്ടാപ്പകല്‍ തോക്കു ചൂണ്ടി യുവതിയുടെ മാല കവര്‍ന്നു. ഇന്നു ഉച്ചയ്ക്ക് 12 മണിയോടെ കൊല്ലം ബീച്ച് റോഡിലാണ് സംഭവം. ഇലക്ട്രിക് ഇന്‍സ്‌പെക്ടറേറ്റിലെ ജീവനക്കാരിയാണ് കവര്‍ച്ചക്കിരയായത്.
ബീച്ച് റോഡിലെ ബെന്‍സികര്‍ ഹോസ്പിറ്റലിനു സമീപത്തെ യൂനിയന്‍ ബാങ്കിനു മുമ്പിലായിരുന്നു സംഭവം. മാല കവര്‍ന്നശേഷം മോഷ്ടാവ് കടന്നു കളഞ്ഞു. കൊല്ലം ഈസ്റ്റ് പൊലിസ് കേസെടുത്ത് അന്വേഷണം ആരംഭിച്ചു. പ്രദേശത്തെ സി.സി. ടി.വി ദൃശ്യങ്ങള്‍ പൊലിസ് പരിശോധിക്കുന്നുണ്ട്. സമാനമായ സംഭവം ഇന്ന് കൊല്ലം കുണ്ടറയിലും ഉണ്ടായിട്ടുണ്ട്. ഇവിടെയും രാവിലെയാണ് സംഭവമെന്നാണറിയുന്നത്. പ്രതിക്കായി പൊലിസ് തിരച്ചില്‍ ഊര്‍ജിതമാക്കിയിട്ടുണ്ട്. പട്ടാപ്പകല്‍ ജില്ലയില്‍ രണ്ടിടത്തായി സമാന സംഭവം ഉണ്ടായത് പൊലിസിനെയും ജനങ്ങളേയും ഞെട്ടിച്ചിട്ടുണ്ട്.