മരട്: സ്വതന്ത്രരുടെ പിന്തുണയോടെ എല്‍.ഡിഎഫ് ഭരിക്കുന്ന മരട് നഗരസഭയില്‍ ഇന്നലെ നടന്ന പൊതുമരാമത്ത്  സ്റ്റാന്റിംഗ് കമ്മിറ്റി ചെയര്‍മാന്‍ തെരഞ്ഞെടുപ്പില്‍ യു.ഡി.എഫ് വിജയം നേടി.  യു.ഡി.എഫിലെ ആര്‍.കെ സുരേഷ് ബാബുവാണ് രണ്ടിനെതിരെ മൂന്ന് വോട്ടുകള്‍ക്ക് എല്‍.ഡി.എഫിലെ ഇ.ആര്‍ സന്തോഷിനെ പരാജയപ്പെടുത്തിയത്.  കോണ്‍ഗ്രസ് വിമതന്‍ ബോബന്‍ നെടുംപറമ്പില്‍  അനുകൂലമായി വോട്ട് ചെയ്തതാണ് യു.ഡി.എഫ് വിജയത്തിന് കാരണമായത്.
മുപ്പത്തിമൂന്ന് അംഗ കൗണ്‍സിലില്‍ ഇരു മുന്നണിക്കും പതിനഞ്ച് വീതം സീറ്റാണ് ഉള്ളത്. വിജയിച്ച മൂന്ന് സ്വതന്ത്രരില്‍  കോണ്‍ഗ്രസസ് വിമതന്‍ ബോബന്‍  ഉള്‍പ്പെടെ രണ്ട് പേര്‍ എല്‍.ഡി.എഫിനെ പിന്തുണച്ചിരുന്നു. മറ്റൊരു സ്വതന്ത്രന്‍ യു.ഡി.എഫിനൊപ്പം ചേര്‍ന്നിരുന്നു. പതിനേഴ് പേരുടെ പിന്തുണയുമായാണ് എല്‍.ഡി.എഫ് ഭരണത്തിലെത്തിയത്.
ധാരണ പ്രകാരം എല്‍.ഡി.എഫ് പക്ഷത്തുള്ള സ്വതന്ത്ര ദിവ്യ അനില്‍ കുമാറിനെ  ചെയര്‍പേഴ്‌സണും കോണ്‍ഗ്രസ് വിമതനെ ആദ്യത്തെ ആറ്മാസം പൊതുമരാമത്ത് സ്റ്റാന്റിംഗ് കമ്മിറ്റി ചെയര്‍മാനും അതിന് ശേഷം വൈസ് ചെയര്‍മാനുമാക്കാമെന്നായിരുന്നു ധാരണ.
എന്നാല്‍ ആറ് മാസത്തിന് ശേഷം വൈസ് ചെയര്‍മാനായിരുന്ന സി.പി.എം അംഗം കെ.എ.ദേവസി രാജിവെക്കാന്‍ കൂട്ടാക്കാതിരുന്നത് കോണ്‍ഗ്രസ് റിബലായി വിജയിച്ച ബോബന്‍ നെടുംപറമ്പിലിനെ ചൊടിപ്പിച്ചു. ഇതേ തുടര്‍ന്ന് ഇദ്ദേഹം സ്റ്റാന്റിംഗ് കമ്മിറ്റി ചെയര്‍മാന്‍  സ്ഥാനം രാജിവെക്കുകയും എല്‍.ഡി.എഫിനുള്ള പിന്തുണ പിന്‍വലിക്കുകയുമായിരുന്നു.
എന്നാല്‍ സി.പി.എമ്മിന്റെയും ഘടകകക്ഷികളുടെയും സമ്മര്‍ദ്ദങ്ങള്‍ക്ക് വഴങ്ങി സി.പി.എം അംഗം രാജിവച്ചെങ്കിലും ബോബന്‍ നെടുംപറമ്പില്‍ നിലപാട് മാറ്റിയില്ല. ഇന്നലെ നടന്ന സ്റ്റാന്റിംഗ് കമ്മിറ്റി തെരഞ്ഞെടുപ്പില്‍ ബോബന്‍ യു.ഡി.എഫ് പക്ഷത്തേക്ക് മാറി വോട്ടു ചെയ്യുകയായിരുന്നു. കനത്ത പോലീസ് കാവലിലായിരുന്നു തെരഞ്ഞെടുപ്പ് നടന്നത്.
അഞ്ചംഗ പൊതു മരാമത്ത് സ്റ്റാന്റിംഗ് കമ്മിറ്റിയില്‍ ബോബനെ കൂടാതെ ഇരു മുന്നണിക്കും രണ്ടു വീതം അംഗങ്ങളാണുള്ളത്. ബോബന്‍ യു.ഡി.എഫിനൊപ്പം നിന്നാല്‍ നഗരസഭ ഭരണവും യു.ഡി.എഫിനൊപ്പമാകും. പതിനൊന്നിന് നടക്കുന്ന വൈസ് ചെയര്‍മാന്‍ തെരഞ്ഞെടുപ്പില്‍ യു.ഡി.എഫ് സ്ഥാനാര്‍ത്ഥി വിജയിക്കാനാണ് സാധ്യത. ഭരണ സ്തംഭനം ഒഴിവാക്കാനും മരടിന്റെ സമഗ്രപുരോഗതിക്കും താന്‍ യു.ഡി.എഫിനെ പിന്തുണക്കുമെന്ന് ബോബന്‍ നെടുംപറമ്പില്‍ അറിയിച്ചു.