സ്വന്തം ലേഖകന്‍

കാസര്‍കോട്: മഞ്ചേശ്വരത്ത് യു.ഡി.എഫ് സ്ഥാനാര്‍ഥിയായി മത്സരിക്കുന്ന മുസ്‌ലിം ലീഗിലെ  എം.സി ഖമറുദ്ദീന്‍ കൈകൊട്ടി പാട്ടുമായി രംഗത്തിറങ്ങിയതോടെ മണ്ഡലത്തിലെ മുന്‍ എം.എല്‍.എ ആയിരുന്ന റദ്ദുച്ചയെന്ന പി.ബി അബ്ദുല്‍ റസാഖിന്റെ ഓര്‍മകള്‍ വോട്ടര്‍മാര്‍ക്കിടയില്‍ വീണ്ടും ഉണര്‍ന്നു. 

 എം.എല്‍.എ ആയിരുന്ന സമയത്ത് കല്യാണമടക്കമുള്ള ചടങ്ങുകളില്‍ ആളുകളെ കൈകൊട്ടിപ്പാട്ടുകളിലൂടെ ഹരം കൊള്ളിക്കുന്നത് റദ്ദുച്ചയുടെ ശൈലിയാണ്. കഴിഞ്ഞ ദിവസം മൊഗ്രാലിലെ കല്യാണ ചടങ്ങില്‍ പങ്കെടുക്കവെയാണ് എം.സിയും പ്രവര്‍ത്തകരും കൈകൊട്ടിപ്പാട്ട് പാടിയത്. 

ഖമറുദ്ദീന്‍ മൈക്കിലൂടെ പാട്ട് പാടിയതോടെ കൂടെയുള്ളവര്‍ ആവേശത്തോടെ കൈകൊട്ടി.

ഇതോടെ കല്യാണ വീട്ടിലെത്തിയവര്‍ സ്ഥാനാര്‍ഥിക്കൊപ്പം തടിച്ചുകൂടി. ഖമറുദ്ദീന്റെ കല്യാണ പാട്ടുകള്‍ സാമൂഹ്യമാധ്യമങ്ങളില്‍ വൈറലായിട്ടുണ്ട്.